Lajme Dosja “Inteligjenca e Zhvatjes”

Publikimet e Shqip.com: KPK degradon dhe transferon prokuroren Shemsije Asllani

Pas shkarkimit të menjëhershëm të Dardan Nuhiut nga ministri Hekuran Murati si pasojë e publikimeve të Shqip.com, degradimit dhe më pas dorëheqjes së gjyqtarit Driton Muharremi, vjen edhe degradimi dhe transferimi i prokurores, Shemsije Asllani, duke u bazuar në publikimin e Dosjes “Inteligjenca e Zhvatjes”.

Këshilli Prokurorial i Kosovës (KPK) e ka degraduar prokuroren Shemsije Asllani nga Departamenti për Krime të Rënda në Departamentin e Përgjithshëm, pas publikimeve të Shqip.com.

Krahas kësaj, KPK e ka transferuar prokuroren Asllani nga Prokuroria Themelore në Prishtinë në Prokurorinë Themelore në Mitrovicë.

Lajmi për degradimin dhe transferimin e Asllanit fillimisht është dhënë nga “Betimi për Drejtësi”.

KPK ende nuk e ka bërë publik në faqen zyrtare degradimin dhe transferimin e Asllanit.

Shqip.com në kuadër të Dosjes “Inteligjenca e Zhvatjes” kishte publikuar edhe tekstin me titull Ekskluzive: Ndërhyrje në raste, ushtrim i ndikimit, keqpërdorim i pozitës dhe fotografi të dyshimta – rasti me plot dritëhije i prokurores Shemsije Asllani, ku në një bisedë telefonike tashmë ishprokurorja e krimeve të rënda në Prishtinë, Shemsije Asllani, i tregonte një telefonuesi se si ka ndikim të madh brenda sistemit dhe do ta përdorë këtë ndikim për të ndërhyrë edhe në rastin e tij.

Ajo premtonte se do ta ushtrojë ndikimin e saj, vepër penale kjo e dënueshme deri në tetë vjet burg, në rastin e një personi që thoshte se padrejtësisht iu ka ndaluar një veturë shumë e kushtueshme.

Asllani, siç dëgjohet në incizimet e publikuara, fillimisht refuzon të flas, por qasja i ndryshon kur kupton se bashkëbiseduesi di gjëra sekret për të, të cilat po u zbuluan do t’ia dëmtonin imazhin dhe do të mund ta implikonin në shkelje ligjore.

Asllani, vazhdon bisedën duke e ditur se komunimi me një person privat për një rast në të cilin ajo nuk është prokurore është i ndaluar me ligj.

Shqip.com kishte filluar publikimin e Dosjes “Inteligjenca e Zhvatjes” me 30 korrik. Pas publikimeve dhe debatit të madh publik, kishte reaguar edhe Ministrja e Drejtësisë, Albulena Haxhiu, derisa vetëm pas dy javësh krye-prokurori, Aleksandër Lumezi, që përmendej disa herë nga zyrtarë të ndryshëm në këto përgjime, pati deklaruar në një emision në RTV Dukagjini, se Prokuroria Speciale do të fillojë hetimet për këtë rast.

Asllani është zyrtarja e tretë që afektohet nga publikimet e Shqip.com, meqë fillimisht ishte shkarkuar nga pozita e drejtorit, Dardan Nuhiu, edhe ai pjesë e publikimeve dhe muajin e fundit të vitit të kaluar, u degradua edhe Gjyqtari i Krimeve të Rënda, Driton Muharremi, i cili më pas edhe dha dorëheqje krejtësisht.  

Klikoni në rubrikën N’shënjestër, për të shikuar të gjitha publikimet në Dosjen “Inteligjenca e Zhvatjes” në mënyrë kronologjike./Shqip.com