Hajdari paralajmëron masa direkte kundër shtrenjtimit të produkteve bazë

Ministrja e Tregtisë dhe Ndërmarrësisë, Rozeta Hajdari paralajmëron masa direkte kundër shtrenjtimit të produkteve bazë.

Ajo në një konferencë të përbashkët për media me kryesuesin e Shoqatës së Mullisëve, Bashkim Zejnullahu, se çmimi i bukës është rritur edhe pse të dhënat nga Dogana e Kosovës tregojnë që ka rënie prej 7% të çmimeve furnizuese të grurit dhe miellit.

“Sot në konferencë për media bashkë me kryesuesin e Shoqatës së Mullisëve z. Bashkim Zejnullahu, konfirmuam se kemi furnizim të mjaftueshëm në treg me grurë dhe miell dhe nuk është e arsyeshme rritja e çmimit të bukës. Në ditët e fundit, çmimi i një buke po ndryshon nga 0.45 cent deri në 0.60 cent në disa furra buke, derisa të dhënat e përditësuara të Doganës së Kosovës, për dallim nga muaji maj 2022, konfirmojnë rënie në 7% të çmimeve furnizuese të grurit dhe miellit”, ka shkruar Hajdari në një status në Facebook.

Ajo thotë se bazuar në fakte, do të propozohen masa direkte që do të minimizojnë çmimet e produkteve bazë.

Për këtë ajo thotë se do të ketë koordinim me Inspektoratin e Tregut, Doganën e Kosovës, ATK-në, AKK-në dhe komunitetin e biznesit.

“Marzha tregtare e produkteve bazë të shumicës së operatorëve ekonomik, ka ndryshime nga 8% deri në 19.40% varësisht nga produkti;-disa operatorë ekonomik tregtojnë me marzhën tregtare nën 5% për produktet bazë.

Prandaj, bazuar në evidencë, do të propozojmë masa direkte për të minimizuar manipulimet në çmimet e produkteve bazë, në koordinim të afërt me Inspektoratin e Tregut në nivel qendror dhe komunal, Doganën e Kosovës, Administratën Tatimore të Kosovës, Autoritetin e Konkurrencës dhe Komunitetin e Biznesit”, përfundoi ajo.

Sipas të dhënave nga Ministria e Bujqësisë, nga korrje-shirjet rendimenti pritet të jetë brenda mesatares prej 3.400 deri 4.500 kilogram për hektar.

Bazuar në sipërfaqen e mbjellë dhe rendimentin aktual, pritet të plotësohet rreth 70 për qind e kërkesës për grurë.
Në vitin 2019 dhe 2020 është mbjellë më së paku grurë në dhjetë vjetët e fundit për shkak të pandemisë.

Rrija e subvencionimit nga Qeveria për grurin dhe kulturat e tjera, nuk ka ndikuar në rritjen e sipërfaqes së mbjellë me grurë pasi gruri veçse ka qenë i mbjellë.

Rezultatet e këtij subvencionimi pritet të japin efekt në vjeshtën e vitit 2022./SHQIP.com