Aksioni në Shtërpcë kundër spiunazhit, Policia tregon se çfarë është sekuestruar
Shqip
Në mëngjesin e hershëm të së enjtes, Policia e Kosovës ka kryer një aksion për sekuestrimin e kamerave të cilat dyshohet se janë të vendosura nga strukturat ilegale në Shtërpcë, komunën me shumicë serbe në rajonin e Ferizajt.
Gjatë këtij aksioni janë sekuestruar kompjuterë, dosje me dokumente, libra amëz si dhe kamera të vendosura nëpër rrugë.
“Bazuar në urdhëresën e Gjykatës, janë kryer disa kontrolle në lokacione të ndryshme në komunën e Shtërpcës, ku janë sekuestruar kompjuterë, dosje me dokumente, libra amëz, kamera të vendosura nëpër rrugë, etj”.
Tutje në raportin e policisë është bërë e ditur se rasti është duke u hetuar.
Ndryshe nga ky aksion prokuroria ka thënë se nuk ka ndonjë person të arrestuar.
Theksojmë se Prokurori i Prokurorisë Themelore të Ferizajt, Rasim Maloku, më herët për SHQIP.com ka thënë se kamerat e sigurisë dyshohet të kenë qenë të kontrolluara nga struktura ilegale të Serbisë.
Ai tha se aksioni ndërlidhet me ish-kryetarin e komunës së Shtërpcës, Bratisllav Nikoliq pasi i njëjti është koordinator i strukturave ilegale serbe.
