Përfundon aksioni në Shtërpcë – nuk ka të arrestuar
Ka përfunduar aksioni i Policisë së Kosovës për sekuestrimin e kamerave të cilat dyshohet se janë të vendosura nga strukturat ilegale në Shtërpcë, komunë me shumicë serbe në rajonin e Ferizajt.
Prokuroria Themelore në Ferizaj përmes një njoftimi për media ka thënë se janë bastisur katër lokacione të ndryshme.
Sipas njoftimit të Prokurorisë është bërë edhe largimi i kamerave të vendosura nga strukturat paralele.
Deri më tani prokuroria ka thënë se nuk ka ndonjë person të arrestuar.
Theksojmë se Prokurori i Prokurorisë Themelore të Ferizajt, Rasim Maloku, më herët për SHQIP.com ka thënë se kamerat e sigurisë dyshohet të kenë qenë të kontrolluara nga struktura ilegale të serbisë.
Ai tha se aksioni ndërlidhet me ish-kryetarin e komunës së Shtërpcës, Bratisllav Nikoliq pasi i njëjti është koordinator i strukturave ilegale serbe.
“Ish-kryetari i komunës Bratisllav Nikoliq është edhe koordinator i strukturave ilegale e që këto struktura kanë menaxhuar me kamerat e sigurisë që kanë monitoruar lëvizjet e qytetarëve dhe institucionet publike të Republikës së Kosovës e që këto informacione janë përcjellë në strukturat e sigurisë në Serbi”, tha ai.
Gjatë aksionit, Policia ka sekuestruar edhe dokumente për të cilat, Maloku tha se do të shërbejnë si dëshmi./Shqip.com