Sot Kuvendi i Kosovës diskuton për Trustin

Sot, gjatë seancës së re të Kuvendit të Kosovës do të diskutohet për mundësinë e tërheqjes së 30 përqind të Trustit.

Kujtojmë se lidhur me Trustin, pozita ka deklaruar që nuk do ta votojnë përkundër faktit se disa nga bashkëpartiakët kanë dal pro votimit ndërsa, opozita ka bërë vazhdimisht thirrje që të votohet.

Së fundi, shefi i Grupit Parlamentar të Aleancës për Ardhmërinë e Kosovës, Besnik Tahiri ka thënë se shpreson që nesër do të votohet Trusti pasiqë është kërkesë e qytetarëve të Kosovës.

Ndërsa, deputeti i Partisë Demokratike të Kosovës, Bekim Haxhiu ka deklaruar se ata që nuk e votojnë Trustin, kanë dal kundër kërkesave të qytetarëve.

Kujtojmë se para një muaji, Komisioni për Buxhet, Punë dhe Transfere, kishte votuar kalimin e propozimit për tërheqjen e 30 për të Trustit.

Lidhur me këtë propozim kanë votuar nëntë deputetë, ku prej tyre katër ishin për, tre kundër dhe dy abstenuan.

Përkundër faktit se ishte shumica e votave, kryetari i këtij komisioni, Armend Mehaj tha se ai nuk kaloi.

“Në mbledhjen e sotme të Komisionit për Buxhet, Punë dhe Transfere, me rastin e votimit të Projektligjit Nr. 08L/178 për plotësimin dhe ndryshimin e Ligjit për Fonde Pensionale të Kosovës, në votim kanë marrë pjesë 9 anëtarë të komisionit. Për kanë qenë 4 vota, kundër kanë qenë 3 vota, abstenim kanë qenë 2 vota. Është konstatuar se komisioni e ka përkrahë projektligjin për miratim në parim. Megjithatë, bazuar në rregulloren 37. Të Kuvendit, komisioni merr vendim me shumicën e votave të anëtarëve që marrin pjesë në votim që në këtë rast për te kaluar në emër të komisionit do të duhej t’i kishte 5 vota për e që nuk është arritë dhe me këtë unë konstatoj se komisioni nuk e ka përkrahë Projektligjin ashtu siç parashihet në votim”, tha Muja.

Ndërsa deputeti i Partisë Demokratike të Kosovës, Mergim Lushtaku kërkoi që të përseritet votimi në mbledhjen e ardhshme të këtij komisioni.

Sipas Rregullores së Kuvendit të Kosovës, neni 37 për Korumin dhe vendimmarrjen në Komision, pika 2 thotë se Komisioni merr vendim me shumicën e votave të anëtarëve që marrin pjesë.

Lexo edhe:

Nuk votohet Projektligji për Trustin

Kurse, rreth gjashtë muaj më parë, Deputetët e Kuvendit të Kosovës nuk kishin arritur që të votojnë për Projektligjin për tërheqjen e 30 për të mjeteve nga Trusti.

Për këtë projektligj kishin votuar gjithsej 102 deputet ku prej tyre 44 pro, 57 kundër dhe 1 abstenim.

Ministri i Financave, Punës dhe Transfereve, Hekuran Murati ka thënë se tërheqja e mjeteve nga Trusti, e shkatërron të ardhmen e pensionistëve.

Vlen të theksohet se votimi i Trustit është mbështetur edhe me një peticion i cili është nënshkruar prej rreth 17 mijë qytetarëve të Kosovës.