Mustafa: Miliona euro po humbin nga vendimet joprofesionale të Qeverisë
Deputeti i Lidhjes Demokratike të Kosovës, Besian Mustafa ka thënë se pas mbylljes së terminalit doganor në Merdare bizneset e regjionit të Llapit po bllokohen në terminalin afër Prishtinës.
Përmes një statusi në Facebook, Mustafa ka thënë se miliona euro janë duke humbur nga vendimet e Qeverisë.
“Pas mbylljes së terminalit doganor në Merdare bizneset e regjionit të Llapit dhe gjithë Kosovës bllokohen me orë të tëra në terminalin pranë Prishtinës. Miliona euro të humbura nga vendimet arbitrare joprofesionale të kësaj Qeverie! Çmimin final e paguajnë qytetarët, natyrisht”, shkroi Mustafa.
Sipas Mustafës “kjo Qeveri nuk ka as ide si të nxjerrë qytetarët dhe sektorin privat nga ky qorrsokak në të cilin i kanë futurë”.
Dogana e Kosovës kohë më parë ka marrë vendim që terminali doganor i Merdarit të zhvendoset.
Për këtë kishte reaguar edhe deputeti dhe shefi i Grupit Parlamentar të AAK-së, Besnik Tahiri.
Sipas Tahirit vendimi për zhvendosjen e terminalit doganor nga Merdari është goditje e madhe për Podujevën./Shqip.com