MPJD: Të dyshuarit për lidhje me Hezbollahun nuk janë shtetas të Kosovës
Ministria e Punëve të Jashtme dhe Diasporës në Kosovë ka hedhur poshtë raportimet në media se personat të cilët u sanksionuan për lidhje të dyshuara me Hezbollahun, janë shtetas të Kosovës.
Qeveria e Kosovës në mbledhjen e mbajtur të mërkurën e 27 tetorit, mori vendim për vendosjen e sanksioneve ndaj shtatë personave dhe një kompanie, të lidhur me organizatën terroriste Hezbollah.
Sipas MPJD-së, masat e vendosura demonstrojnë angazhimin e Kosovës si pjesë aktive e aleancave ndërkombëtare kundër terrorizmit dhe ekstremizmit të dhunshëm.
“Me qëllim të promovimit dhe mbrojtjes së paqes, demokracisë dhe të drejtave dhe lirive të njeriut, marrja e një vendimi të tillë do të kontribuonte në vazhdimin e bashkëpunimit të ngushtë me Shtetet e Bashkuara të Amerikës, si aleat i rëndësishëm, dhe partnerë të tjerë në mbrojtjen e vlerave të përbashkëta, paqes dhe sigurisë”, thuhet në përgjigjen e MPJD-së për Radion Evropa e Lirë.
Në mbledhjen e qeverisë, zëvendëskryeministrja dhe kryediplomatja u shpreh se një vendim i tillë kontribuon në partneritet me Shtetet e Bashkuara të Amerikës.
Siç ka thënë ajo, sanksionet vendosen “konform Rezolutës 1373 të Këshillit të Sigurimit të OKB-së ndaj shtatë individëve dhe një kompanie për lidhjet e tyre me organizatën terroriste Hezbollah dhe rolin e tyre në rrjetin financiar të saj në Gadishullin Arabik”.
Më 23 qershor të vitit 2020, Qeveria e Kosovës e ka shpallur organizatë terroriste krahun politik dhe atë ushtarak të Hezbollahut.
Hezbollah është një grup shiit i Libanit, i themeluar në vitet e 80-ta. Më herët është shpallur organizatë terroriste edhe nga Shtetet e Bashkuara dhe shtete të tjera perëndimore.
Hezbollah përkrah ideologjinë islamike shiite të Teheranit dhe e konsideron liderin suprem të Iranit, Ajatollah Ali Khamenei, si udhëzues politik dhe shpirtëror./SHQIP.com