Kosova kërkon kthimin e artefaktit mijëvjeçar që po mbahet ilegalisht në Serbi

Ministria e Kulturës, Rinisë dhe Sportit po vazhdon kërkimin e artefakteve të vendit, që po mbahen ilegalisht në Serbi.

Në mesin e shumë artefakteve, së fundmi MKRS, ka kërkuar kthimin e artefaktit nga balta i periudhës V-IV, para Krishtit, e që u zbulua në Mitrovicë.

“Kjo figurinë zoomorfe (kafshë) e punuar nga balta, i përket periudhës së neolitit të vonë (mijëvjeçari V – IV para Krishtit) dhe është zbuluar në Fafos – Mitrovicë, Republika e Kosovës”, thuhet në postimin e MKRS, në rrjetin social Twitter.

This zoomorphic (animal form) figurine made out of clay, belongs to Late Neolithic Period (5th – 4th millennium BC) & was discovered in Fafos – Mitrovica, Republic of Kosova. It is one of 1247 exhibits of 🇽🇰 museum’s collections held illegally by Serbia since 1999. 1/2 pic.twitter.com/2r4B8ijlEN

— Ministry of Culture, Youth and Sport (@MKRS_KS) October 12, 2022

Artefaktet e Kosovës, u morën nga Serbia për një ekspozitë të përkohshme në Beograd në vitin 1999, e që sipas marrëveshjes së Muzeut Kombëtar të Kosovës e atij të Beogradit, artefaktet duhet të ktheheshin.

Janë pothuajse 1247 artefakte që po mbahen në muzeun e Beogradit, e që Kosova vazhdimisht kërkon kthimin e tyre.

Nga këto 1247 artefakte, është kthyer vetëm një, ai i Hyjneshës në Fron, e që është i ekspozuar në Muzeun Kombëtar të Kosovës.