Hoti: Vendimi për shkarkimin tim erdhi pasi denoncova Bordin për keqpërdorime

Bordi i Drejtorëve të Stacionit të Autobusëve në Prishtinë, ditë më parë ka marrë vendim për të shkarkuar Luan Hotin nga pozita e kryeshefit ekzekutiv të kësaj ndërmarrje.

Sipas vendimit, arsyet e shkarkimit janë shkeljet ligjore që Hoti ka kryer gjatë kohës si kryeshef.

Në vendimin e tij, Bordi ka numëruar një serë shkeljesh.

Gjithnjë sipas vendimit, atij i është shqiptuar edhe vërejtje me shkrim duke i dhënë afate të caktuara kohore për reflektim, por “i njëjti ka degraduar edhe më tutje sjelljen e tij”.

Por, një vendim të tillë dhe arsyet e lartpërmendura po i kundërshton Hoti, i cili ka një version tjetër për këtë rast.

Vendimi për shkarkimin e tij, pohon se është “jo i ligjshëm, me gabime dhe pretendime të pabaza në arsyetimin e dhënë të vendimit”.

Ai thotë se është njoftuar paraprakisht për shkarkimin dhe sipas tij, vendimi ka ardhur pas një denoncimi që thotë se e kishte bërë për keqpërdorim të detyrës zyrtare nga ana e Bordit të Drejtorëve.

Në një përgjigje me shkrim për Shqip.com, Hoti deklaroi se aksionarët e Stacionit të Autobusëve dhe Bordi i kanë ofruar dorëheqje, të cilën tha se nuk e ka pranuar.

“Aksionarët dhe bordi më kanë ofruar dorëheqje për shkak të ardhmërisë sime të cilën ofertë nuk e kam pranuar. Kjo ka ndodhë me 5 Tetor. Pasi që nuk e kam pranuar ofertën paraprake, me datë 7 me kanë shkarkuar”.

Ndërkohë, Stacioni i Autobusëve në Prishtinë të premten e 8 tetorit 2021, ka shpallur konkurs për pozitën e kryeshefit ekzekutiv të ndërmarrjes, i cili ka mandat tri vite./SHQIP.com