E pranon Qeveria: Jemi në komunikim me SHBA-të për strehimin e afganëve

Qeveria e Kosovës e ka pranuar që është në komunikim të vazhdueshëm me Shtetet e Bashkuara të Amerikës rreth çështjes së pranimit të disa refugjatëve nga Afganistani.

Para disa dite, Reuters kishte raportuar se “Qeveria e Kosovës është në bisedime me SHBA-të për sa i përket kësaj krize humanitare”.

Shefi i stafit të kryeministrit, Luan Dalipi e ka konfirmuar këtë për Gazetën Online Shqip.com

“Që nga mesi i korrikut jemi në komunikim dhe bashkëpunim të vazhdueshëm me autoritetet shtetërore dhe ushtarake amerikane për këtë çështje të dhimbshme e të ndjeshme. Ka shumë punë logjistike e teknike, të sigurisë dhe sociale, që po i trajtojmë me kujdes. ShBA-të janë aleati ynë kryesor dhe partneri ynë strategjik. Gjithçka do të përmbyllet mirë”, ka thënë Dalipi.

Mëngjesin e së dielës, kryeministri i Shqipërisë, Edi Rama, kumtoi vendimin e Tiranës për pranimin e një numri refugjatësh.

Këtë ai sugjeroi edhe Prishtinës – t’i përgjigjet pozitivisht ftesës së SHBA-ve.

Shumë bashkëpunëtorë të NATO-s gjatë këtyre njëzet viteve në Afganistan kanë ikur nga vendi.

Kjo për shkak të rrezikut nga persekutimi eventual që mund të pësojnë nga talebanët.

Mediat ndërkombëtare kanë raportuar se talebanët kanë pushtuar të gjitha qytetet, përpos kryeqytetit, Kabulit.

Por, të dielën janë nisur edhe në drejtim të Kabulit dhe Qeveria e mbështetur nga SHBA është gati të bie.

Në këtë krizë humanitare edhe kreu i opozitës në Shqipëri, Lulzim Basha ka shprehur pajtimin e tij që Shqipëria të jetë në linjën strategjike të SHBA-ve.

Ashtu edhe opozita në Kosovë, Vlora Çitaku, nënkryetare e Partisë Demokratike të Kosovës, kërkoi që të pranohet një numër afganësh në Kosovë për shkak të situatës atje. /Shqip.com