Blerta Basholli: Ka shumë për të bërë në shoqëritë tona patriarkale

Regjisorja e filmit “Zgjoi”, Blerta Basholli, po shfaq dhe po prezanton kulturën e historinë e Kosovës, në vendet e ndryshme të botës.

Së fundmi, Basholli, në një intervistë për një gazetë greke, ka treguar se si personaliteti i fortë i Fahrije Hotit dhe grave të tjera shqiptare e frymëzuan atë.

Ajo tha se ndihet optimiste për faktin që Fahrije Hoti, ka shfaqur mjaft mirë rezistencën e grave shqiptare.

“Nuk kam bërë ndonjë kërkim të veçantë, por duke jetuar në Kosovë konstatoj se shumëçka ka ndryshuar. Tashmë kemi edhe një Presidente të Republikës femër. E vlerësoj shumë, është një politikane inteligjente dhe më e pëlqyera për sa i përket votave”, është shprehur ajo.

“Fahrije ndihmoi në ndryshimin e mentalitetit në fshatin e saj. Në të njëjtën kohë, ka shumë për të bërë në shoqëritë tona patriarkale për të arritur barazinë. E njëjta gjë është e vërtetë kudo”.

Akoma më optimiste dhe më inkurajuese është rilindja e kinematografisë kosovare në vitet e fundit, me gra regjisore në krye. Si e interpretoni këtë fakt?

Ka shumë regjisore femra që bëjnë filma kaq të mrekullueshëm me një buxhet kaq të ulët dhe fitojnë çmime ndërkombëtare. Kjo më frymëzon dhe më bën krenare, ashtu siç frymëzon të gjithë të tjerët.

Shpresoj që shteti ta kuptojë më shumë këtë dhe të investojë në kinema, sepse këta filma tërheqin vëmendjen e vendit – dhe janë pikërisht gratë që e arrijnë këtë.

Unë jap mësim në universitet dhe ka shumë të reja që studiojnë kinematografi, gjë që i inkurajon të bëjnë filma dhe jo thjesht të bëhen mësuese apo të bëjnë çfarëdo tjetër që është e përshtatshme.

Shteti duhet të fokusohet në financimin e projekteve filmike.

Deri tani kemi punuar për pak para me entuziazëm dhe dashuri, por punonjësit e fushës mund të binden ta bëjnë këtë nja dy herë. Kjo është arsyeja pse ata janë ende të fokusuar në seriale apo reklama.

Kemi mundësi, thjesht na duhen më shumë investime shtetërore.

“Zgjoi”, siguroi shpërndarjen greke në kohë, një fakt i pazakontë për bashkëprodhimin shqipfolës/ kosovar. Si ndiheni për këtë?

Më duket e natyrshme, ndonëse nuk ka qenë gjithmonë kështu, që të shpërndahen filma të një vendi tjetër, sepse ne dimë më shumë për kinemanë e Amerikës Veriore dhe Gjermane se sa për kinemanë greke apo kosovare.

Përveç faktit që jam miqësor me njerëz nga Greqia, është e rëndësishme që filmat të shpërndahen nga vendet fqinje sepse mësojmë nga njëri-tjetri. Është e natyrshme të vazhdohet me bashkëprodhimet ballkanike.

Ballkani ka qenë gjithmonë një rajon i trazuar. Si e parashikoni të ardhmen e tyre dhe sa i përket marrëdhënieve ndërmjet Kosovës dhe Serbisë?

Është qesharake që e urrejmë njëri-tjetrin në këtë shekull. Nuk na mbetet gjë tjetër veçse të pranojmë njëri-tjetrin, qoftë në aspektin e politikës apo edhe në atë kulturor.

Në fushën e kinemasë, mendoj se vendet e Ballkanit duhet të jenë të hapura – dhe do të jenë të hapura – më shumë ndaj bashkëprodhimeve.

Në fund të fundit, ne të gjithë jemi njerëz që luftojmë për të njëjtat gjëra në jetën në planet, të cilat po i shkatërrojmë ngadalë. Ne duhet të merremi me çështje më të rëndësishme sesa dallimet tona politike dhe kulturore.

Mos harroni kurrë të kaluarën, por kërkoni të ardhmen!