Dreshaj: Keqmenaxhimi në shëndetësi po prodhon skena të filmave horror

Deputeti i Aleancës për Ardhmërinë e Kosovës, Shëmsedin Dreshaj ka thënë se menaxhimi i dobët në shëndetësi ka bërë që të prodhohen skena të ngjashme me filma horror.

Përmes një postimi në Facebook, Dreshaj tha se sektori më i rëndësishëm i vendit ka mbetur në dorë të askujt.

“Menaxhimi i dobët në shëndetësi, javë më javë e muaj për muaj është kah prodhon skena të ngjashme me filma horror. Paramendojeni një shtet, respektivisht një qeveri e cila nuk mund ta emërojë një ministër tash e 78 ditë. Sektori më vital i cili kujdeset për njerëzit që kanë më së shumti nevojë, ka mbetur në duart e askujt”, shkroi Dreshaj.

Dreshaj përmendi edhe rastin e në Spitalin e Përgjithshëm në Pejë për të cilin u raportua mbrëmë.

“Është e pafalshme që të ndodh një rast i tillë si ky në Pejë, e Qeveria e Kryeministri ende të hamenden për caktimin e udhëheqësit të sektorit të Shëndetësisë. Përgjegjësia është tek Kryeministri!”.

Kujtojmë së Spitalin Rajonal të Pejës së fundi ka ndodhur një ngjarje e pazakontë.

Foshnja e vdekur futet në lavatriçe në Spitalin e Pejës, nisin hetimet – SHQIP.com

Një foshnje e vdekur është futur në lavatriçe e pështjellur së bashku me çarçafë.

Lajmin e ka konfirmuar për shqip.com, kryeprokurori i Prokurorisë Themelore në Pejë, Agim Kurmehaj.

Kurmehaj tha se tashmë kanë nisur hetimet për këtë rast.

“Po ju konfirmoj se rasti ka ndodhur dhe ne si prokurori kemi ndërmarrë veprime e duhura për zbardhje të rrethanave”, tha Kurmehaj.

Mehaj konfirmoi se foshnja ka qenë e vdekur kur ka ndodhur edhe ngjarja.

Ndërsa, lidhur me rastin Spitali i Përgjithshëm në Pejë ka suspenduar shtatë punonjës.