Zvicra u kërkon talebanëve të anulojnë ndalimin e grave që punojnë për OKB-në

Zvicra të enjten u bëri thirrje talebanëve të anulojnë ndalimin e saj për gratë që punojnë me OKB-në, duke thënë se kjo “pengon punën humanitare që shpëton jetë”.

“Përjashtimi i grave nga puna shkel të drejtat e tyre të njeriut. Përjashtimi i grave nga puna në UNAMA (Misioni i Ndihmës së OKB-së në Afganistan) në Afganistan pengon punën humanitare që shpëton jetë,” tha Ministria e Jashtme.

“Zvicra u kërkon talebanëve të ndryshojnë vendimin e tyre dhe të respektojnë këto të drejta”, shtoi ajo.

Të mërkurën, talebanët lëshuan një ndalim mbarëkombëtar për gratë afgane që punojnë me organizmin global, shkruan Anadolu.

Veprimi vjen pas ndalimit të grave që punojnë me OJQ-të, të lëshuar më 24 dhjetor 2022, dhe listës së gjerë të kufizimeve të mëparshme për gratë dhe vajzat e vendosura që kur talebanët morën pushtetin.