“The Times”: Lumenjtë e Shqipërisë, xhevahirë të kurorës së saj

“The Times” zbulon Shqipërinë përmes turizmit të aventurës, të përvojave unike të rafting në ujërat e Vjosës.

Kështu u shpreh sot kryeministri Edi Rama, ndërsa ndau në rrjetet sociale shkrimin e botuar nga “The Times”.

Në artikullin e “The Times”, përshkruhet Vjosa, Parku i Parë Kombëtar i një lumi të egër në Evropë, madhështia e maleve që rrethojnë luginën, shija e mirë që vjen nga bujtinat, guidat fantastike dhe udhërrëfyesit turistikë.

“Vjosa është vetëm një nga mrekullitë e shumta të eksploruara nga ky itinerar. Për mua lumenjtë e Shqipërisë mbeten xhevahiri i kurorës së saj. Kur bëhet fjalë për një ndjenjë të vërtetë madhështie, Vjosa është në një ligë më vete, pasi ajo përshkon rrugën e saj nën malet e mbushura me dëborë dhe mbush gjysmën e luginës së saj me drurë. Megjithatë, lumi më i mahnitshëm që kemi parë është ai i Osumit, i cili ka kaluar nëpër një shtrirje gëlqerore për të krijuar 20 kilometra kanion të pjerrët dhe të ngushtë”, shkruan The Times.

“Ndërsa ecnim përpara, dhe Hoxha (një udhërrëfyes) na fliste për historinë e vendit, u bë e qartë se ky peizazh nuk është rezultat i një planifikimi të kujdesshëm; është shenjë e katastrofës së vazhdueshme të shekullit të 20-të – herë ishte pushtim i huaj, herë luftë, për një periudhë shumë të gjatë ishte një diktaturë e vetme komuniste dhe nganjëherë anarki. Tani, çuditërisht, rezultati përfundimtar duket si një Kopsht Evropian i Edenit – një vend i pacenuar i larë në rrezet e diellit të vazhdueshme”, thuhet tutje.