Takimi me Blinken, Kurti: Jemi angazhuar në mënyrë konstruktive e kreative në dialogun me Serbinë

Kreu i Qeverisë së Kosovës, Albin Kurti, ka publikuar një deklaratë në profilin e tij pas takimit me Sekretarin Amerikan, Antony Blinken.

Kurti tha se takimi me Sekretarin amerikan të Shtetit ishte “shumë i përzemërt”.

Ai tha se nga Blinken kanë kërkuar shtimin e investimeve amerikane në Kosovë si dhe rritjen e shkëmbimit tregtarë midis dy vendeve.

Gjithashtu, ka njoftuar se në takim kanë folur për punën e dialogut me Serbinë dhe ka theksuar se Kosova është e përkushtuar për një marrëveshje ligjërisht obligative të përqëndruar në njohje reciproke.

“Në takim konfirmuam që Republika e Kosovës është e përkushtuar për arritjen e një marrëveshjeje ligjërisht të obligueshme që në qendër ka njohjen reciproke ndërmjet Kosovës dhe Serbisë dhe se deri më tani jemi angazhuar në mënyrë konstruktive dhe kreative në procesin e dialogut”, ka shkruar Kurti në Facebook.

Në takimin e 26 korrikut të mbajtur në Uashingon, Blinken falënderoi delegacionin e Kosovës për pritjen e afganëve dhe mbështetjen e Kosovës për Ukrainën.

Ai po ashtu tha se kanë diskutuar edhe për “çështjet kritike të sigurisë rajonale”, por nuk dha më shumë detaje.

“Shtetet e Bashkuara e mbështesin integrimin euroatlantik dhe ndërkombëtar të Kosovës, si dhe dialogun Kosovë-Serbi të lehtësuar nga BE-ja”, ka shkruar Blinken në Twitter.

Në një deklarim për media, pas takimit me Blinkenin, Osmani tha që takimi ishte i “shkëlqyeshëm” dhe edhe një herë u konfirmua që “Kosova nuk ka mik më të madh e më të mirë sesa SHBA-të”.

Osmani tha se kanë biseduar edhe për fuqizimin e subjektivitetit të Kosovës në arenën ndërkombëtare, nevojën e Kosovës që të jetë anëtare e NATO-s, si dhe për “rolin konstruktiv të Kosovës në dialogun me Serbinë”.

Ky është takimi i parë i përbashkët i këtij formati në Departamentin e Shtetit, në Uashington D.C.

Ndërkohë, më 27 korrik, krerët e shtetit do të marrin pjesë në ceremoninë e nënshkrimit të Marrëveshjes së Programit Kompakt me Korporatën e Sfidave të Mijëvjeçarit -MMC.

Këtë marrëveshje pritet ta nënshkruaj ministrja e Ekonomisë, Artane Rizvanolli, kjo pasi, Qeveria e Kosovës kishte marrë vendim që Rizvanolli të autorizohet nga presidentja Osmani për nënshkrimin e marrëveshjes me Korporatën e Sfidës së Mijëvjeçarit (MCC)./Shqip.com