SHBA-të ofrojnë 10 milionë dollarë për informacionet që lidhen me kreun e Al Kaidës

Seif al-Adel, një ish-oficer i forcave speciale egjiptiane, i cili është anëtar i rangut të lartë i Al Kaidës, tani është udhëheqësi “i pakontestueshëm” i grupit militant, sipas një raporti të ri të OKB-së mbi organizatën.

Al Kaida nuk ka emëruar zyrtarisht një pasardhës të Ayman al-Zawahirit, i cili besohet të jetë vrarë në një sulm raketor amerikan në Kabul vitin e kaluar, duke i dhënë një goditje organizatës që kur themeluesi i saj Osama bin Laden u vra në 2011.

Megjithëse një zyrtar i inteligjencës amerikane tha në janar se pasardhësi i Zawahirit mbeti i paqartë, raporti i Kombeve të Bashkuara për vlerësimin e rreziqeve nga grupi tha: “Në diskutimet në nëntor dhe dhjetor, shumë shtete anëtare mendojnë se Seif al-Adel tashmë po vepron si de fakto dhe lider i pakontestueshëm i grupit”.

Vdekja e Zawahirit nxiti presionin mbi grupin për të zgjedhur një udhëheqës strategjik i cili mund të planifikojë me kujdes operacionet vdekjeprurëse dhe të drejtojë një rrjet xhihadist, thonë ekspertët e Al Kaidës.

Ndryshe nga paraardhësit e tij të vrarë, të cilët mbanin një profil të lartë me video të zjarrta të transmetuara anembanë globit që kërcënonin Shtetet e Bashkuara, ekspertët thonë se Adel planifikoi sulme nga hija, ndërsa ndihmoi në shndërrimin e Al Kaidës në grupin militant më vdekjeprurës në botë.

Adel u padit dhe u akuzua në nëntor 1998 nga një juri e madhe federale e SHBA-së për rolin e tij në sulmet me bomba në ambasadat e SHBA-së në Tanzani dhe Kenia që vranë 224 civilë dhe plagosën më shumë se 5000 të tjerë.

Ka pak foto të tij, përveç tre fotove – duke përfshirë një imazh shumë serioz bardh e zi të tij në listën e më të kërkuarve të FBI-së .

Përtej operacioneve në Afrikë, kampeve të tij stërvitore dhe lidhjes me vrasjen e gazetarit amerikan, Daniel Pearl në Pakistan në vitin 2002, sipas hetuesve amerikanë, pak dihet për Adelin.

Departamenti Amerikan i Shtetit thotë se Adel është i vendosur në Iran. Programi Shpërblime për Drejtësi i departamentit ofron deri në 10 milionë dollarë për informacion mbi Adelin, për të cilin thotë se është anëtar i “këshillit drejtues të Al Kaidës” dhe kryeson komitetin ushtarak të organizatës.

Faqja e internetit e programit thotë se pas bombardimeve në Afrikë, ish-nënkoloneli i ushtrisë egjiptiane u zhvendos në Iranin juglindor, ku jetoi nën mbrojtjen e Korpusit të Gardës Revolucionare Islamike të vendit, raporton Reuters.