SBASHK-u po bëhet gati për protestën e 4 dhjetorit

Sindikata e Bashkuar e Arsimit, Shkencës dhe Kulturës ka paralajmëruar se me 4 dhjetor do të mbajnë protestë për shkak të mos miratimit të Ligjit për Paga dhe implementimit në tërësi të Kontratës Kolektive.

Ndaj, përmes një komunikate për media, nga kjo sindikate kanë njoftuar se në kudër të përgatitjeve për këtë protestë, kanë nisur takimet konsultative me përfaqësues të Këshillave prindërve duke filluar me Prishtinën.

“Në selinë e SBASHK-ut kryetari i SBASHK-ut Rrahman Jasharaj bashkë me koordinatorin për organizim të brendshëm Ymer Ymeri dhe kryetarin e Kuvendit të Sindikatës së Arsimit Parauniversitar të Prishtinës, Ahmet Pllana kanë pritur kryetarin e Këshillit të prindërve Jeton Demi dhe anëtarët e kryesisë së Këshillit të prindërve të Prishtinës Nexhmi Hoxha dhe Besim Cakolli”.

“Përfaqësuesit e SBASHK-ut kanë informuar Këshillin e prindërve për situatën në arsim dhe për vendimin që në mungesë të gatishmërisë për dialog të Qeverisë të fillohet me veprime sindikale”, thuhet në komunikatën për media.

“Ata kanë thënë se SBASHK po bën gjithë angazhimet e mundshme që çështja e Ligjit të pagave të zgjidhet drejt përmes dialogut dhe takimeve të sindikatave me përfaqësues të Qeverisë në mënyrë që të mos shkohet në grevë dhe prandaj ka ftuar përfaqësuesit e Këshillave të prindërve që të jenë bashkë me SBASHK-un në këto angazhime me shpresë se mesazhi i përbashkët do të kuptohet drejt nga Qeveria dhe do të nis zgjidhja e drejtë për ligjin e pagave”.

Nëse edhe këto angazhime nuk japin rezultatin e pritur, atëherë SBASHK-u thotë se do të ndodhin grevat në tërë sistemin arsimor.

“Kryetari i Këshillit të Prindërve për Prishtinën Jeton Demi bashkë Nexhmi Hoxhën e Besim Cakollin janë shprehur se përkrahin kërkesat legjitime të SBASHK-ut dhe shprehin respekt për përpjekjet që çështjet të zgjidhen me dialog”.

“Po ashtu kanë lavdëruar angazhimin për gjithë këtë përkushtim në mënyrë që të mos vije deri të grevat që paralizojnë tërë sistemin arsimor. Ata janë shprehur se do të debatojnë me kryesinë e Këshillit të prindërve të Prishtinës për të qenë bashkë me 4 dhjetor në protestë me shpresën se Qeveria do të reflektojë dhe do të arrihet marrëveshje pa pasur nevojë për veprime të tjera”.

Ndërsa gjatë kësaj te enjte, Këshilli për Mbrojtjen e të Drejtave të Njeriut (KMDLNj) i ka bërë thirrje SBAShK-ut që të mos kërcënojë me protesta, por t’i kthehen dialogut me qeverinë për të gjetur një zgjidhje.

Ndërsa, gjatë kësaj te enjte, Këshilli për Mbrojtjen e të Drejtave të Njeriut (KMDLNj) i ka bërë thirrje SBASHK-ut që të mos kërcënojë me protesta, por t’i kthehen dialogut me qeverinë për të gjetur një zgjidhje.

Sipas këtij Këshilli, SBASHK-u ka dëmtuar proceset mësimore në vazhdimësi dhe ka shkaktuar dëme të pariparueshme në arsim.

Ndërkaq, kushtëzimin për Ligjin e Pagave e vlerësojnë si shantazh i palejueshëm dhe i papranueshëm./SHQIP.com