Sali Zyba kërkon hetim nga prokuroria për armen e Abelard Tahirit

Deputeti i Lëvizjes Vetëvendosje, Sali Zyba, ka kërkuar hetim nga prokuroria për shefin e Grupit Parlamentar të Partisë Demokratike të Kosovës, Abelard Tahiri, i cili kishte mbajtur armen e personalizuar edhe shtatëve pas përfundimit të mandatit si shef i kabinetit të Qeverisë Thaçi.

Shqip.com raportoi për këtë një ditë më parë, ku zyra e kryeministrit demantoi se arma nga Tahiri është dorëzuar në gusht të vitit 2021.  Madje, dorëzimi nuk ishte bërë me vullnetin e tij, por pas kërkesës së Sekretariatit.

“Ka disa javë që po raportohet se kryetari i Grupit Parlamentar të PDK-së, sa ishte shef i kabinetit të kryeministrit bashkë me stafin politik, qenka pas pajisur me armë të personalizuar dhe shurdhuese. Shurdhueset janë të ndaluara edhe sipas Kodit Penal. Armët me shurdhuese nuk përdorën për vetëmbrojtj. Dje doli lajmi se ai e kishte mbajtur këtë armë edhe për shtatë vjet tjera pas përfundimit të mandatit. A ka ndonjë veprim nga prokuroria?”, ka deklaruar Zyba.

Shqip.com javë më parë ka raportuar se si Tahiri me para të shtetit kishte blerë armë të personalizuar, në vitin 2011.

I kontaktuar nga Shqip.com Tahiri pati deklaruar se “Ajo armë është përdorë prej meje gjatë kohës sa kam qenë shef i kabinetit dhe në momentin kur jon dorëzuar pajisjet që janë përdorë, ai është një aset i zyrës së kryeministri është kthy në zyrën e kryeministrit dhe vazhdon me u përdorë nga zyrtarët e zyrës së kryeministrit”.

Përveç Tahirit, me armë rezultoi të jenë pajisur i gjithë stafi i kabinetit.

Madje, ish- kryeministri Thaçi kishte furnizuar kabinetin edhe me 20 mijë fishekë dhe 5 shurdhues.

Furnizimin e kabinetit, ai e kishte bërë në shkurt të vitit 2011, me të marrë mandatin e dytë si kryeministër.

Në dokumente figuron edhe ish-shefi i stafit Bekim Çollaku dhe Isni Thaçi.

Tahiri, nuk e kishte dorëzuar armën e zjarrit të personalizuar me të përfunduar mandatin më 2014, ashtu siç deklaroi.

Ai rezulton të ketë qenë i pajisur me armë edhe 7 vjet të tjera, pas përfundimit të detyrës qeveritare, përkundër se ishte aset i Zyrës së kryeministrit.

Edhe zëvendësministri i Drejtësisë, Blerim Sallahu ka reaguar pasi që Abelard Tahiri nuk e kishte kthyer më kohë armën e personalizuar.

Sallahu këtë veprim të Tahirit e ka quajtur të turpshëm.

“Armë me emër personal (pa ë) të gravuar në të, 20.000 fishekë, me pare të shtetit. Sot u kuptua që Tahiri as nuk e paska kthyer armën deri para 8 muajsh, përkundër që ka qenë i obliguar ta bëjë shumë më herët. Turp!”, ka shkruar Sallahu./Shqip.com