Reciprociteti për targat – ambasadorët e QUINT-it i shkojnë Kurtit në takim

Kryeministri i Kosovës, Albin Kurti ka pritur të martën në takim ambasadorët e Francës, Gjermanisë, Italisë, Mbretërisë së Bashkuar dhe Shteteve të Bashkuara të Amerikës.

Takimi është mbajtur pas situatës së shkaktuar në veri të vendit me vendosjen e reciprocitetit për targa.

Kosova dhe Serbia janë pajtuar në shtator të 2016-s për mbulimin me letër ngjitëse në pjesë të caktuara të tabelave. Por, pasi marrëveshja ka përfunduar para një jave, Qeveria e Kosovës ka marrë vendim që të ua vendosë targat e përkohshme të gjitha veturave që hyjnë në territorin e saj nga Serbia.

Ky vendim është marrë si përgjigje ndaj Serbisë që ka disa vite që ka bërë ngjashëm me veturat të cilat kishin targat e Kosovës (RKS).

Vendimi nxiti protesta të serbëve që kanë bllokuar rrugët në Jarinje e Bërnjak, në drejtim të pikave kufitare me Serbinë.

Për marrjen e targave të përkohshme duhet të paguajnë 5 euro dhe vlefshmëria e tyre është 60 ditë./SHQIP.com