Ramosaj për vrasjen në Deçan: Lus qytetarët që nëse kanë informacione të bashkëpunojnë me institucionet
Kryetari i Deçanit, Bashkim Ramosaj, ka bërë thirrje nga qytetarët që nëse kanë ndonjë informacion rreth vrasjes në Gllogjan të kësaj komune, të bashkëpunojnë me institucionet relevante, përcjell Shqip.com.
Përmes një postimi në Facebook, Ramosaj theksoi se është një mëngjes i trishtë për Deçanin pas sulmit që ndodhi mbrëmjen e së premtes ku mbetën të vdekur tre persona.
“Mëngjes i trishtë për Deçanin, e tërë kombin tonë, pas sulmit makabër që ndodhi mbrëmë në Gllogjan, ku humbën jetën dy nxënës, Genta Mustafaj e Ledian Hamzaj dhe shoferi i autobusit Gani Gjokaj, ku mbeti i plagosur edhe nxënësi Fliant Turkaj nga Dubrava e Deçanit.
Duke ju shprehur ngushëllime familjeve, lus të gjithë qytetarët që kanë ndonjë informacion rreth këtij krimi makabër, të bashkëpunojnë me institucionet relevante!”, ka shkruar ai.
Ndryshe, mbrëmjen e së premtes në fshatin Gllogjan të Deçanit , një person ka shtënë me armë zjarri drejt një autobusi, ku kanë mbetur të vdekur shoferi dhe dy nxënës, kurse një tjetër është plagosur.
Ndërkaq, Policia e Kosovës ka njoftuar se dyshohet që vrasja është kryer me kallashnikov “AK-47”, teksa rasti është duke u hetuar si “vrasje e rëndë”./SHQIP.com