OVL e UÇK-së: Me Kurtin nuk gjetëm gjuhë të përbashkët, protestojmë nëse Projektligji për Pagën minimale kalon në lexim të dytë

Ushtruesi i detyrës së kryetarit të OVL-UÇK-së, Faton Klinaku ka paralajmëruar protestë në ditën kur do të bëhet leximi i dytë i shqyrtimit të Projektligjit për Pagën minimale.

Përmes një konference për media, Klinaku tha se me kryeministrin Kurti nuk kanë gjetur një gjuhë të përbashkët në lidhje me situatën e krijuar nga krijimi i Projketligjit për Paga dhe protestën e organizuar nga OVL-UÇK-së.

“Në takim me kryeministrin Kurti nuk kemi gjetur gjuhë të përbashkët. Kurti vazhdon të insistoj me qëndrimet e tij diskriminuese me tendencë politizuese ndaj çështjes së veteranëve dhe nuk e plotësoi kërkesën tonë që është minimale jo-diskriminim i veteranëve më Ligjin për Pagën minimale”, tha Klinaku.

Klinaku, thotë se i jepin kohë Qeverisë që deri në leximin e dytë të shqyrtimit të Projektligjit për Pagën minimale, të përmirësohet gabimi i Qeverisë.

“Ne, i jepim kohë Qeverisë që deri në lexim të dytë të përmirësojnë gabimin e diskriminimit të veteranëve. Nëse nuk rregullohet deri në lexim të dytë ky problem dhe diskriminimi vazhdon, ne paralajmërojmë protestë në ditën kur do të mbahet seanca për leximin e dytë të shqyrtimit për projektligjin për Pagën minimale”, tha Klinaku.

Në rast se nuk përmbushët kërkesa e veteranëve as pas leximit të dytë të Ligjit për Pagën minimale, Klinaku thotë se do të diskutojnë se çfarë lloj protestash do të organizohen në vazhdimësi.

Ligji për Paga ka kaluar në Kuvend pas leximit të parë.

Për këtë, veteranët protestuan dhe në mbështetje i dolën dhe deputetët nga partitë opozitare./Shqip.com