OBSh rekomandon mospërdorimin e ëmbëlsuesve

Organizata Botërore e Shëndetësisë ka rekomanduar ndërprerjen e përdorimit të zëvendësuesve të sheqerit si ndihmues në humbjen e peshës ose për të reduktuar rrezikun e sëmundjeve të lidhura me dietën si sëmundjet e zemrës dhe diabeti.

Në udhëzimin e ri të lëshuar më 15 maj nga organi global i shëndetit thuhet se një rishikim i provave në dispozicion, sugjeron se përdorimi i ëmbëlsuesve pa sheqer “nuk sjell ndonjë përfitim afatgjatë në reduktimin e yndyrës së trupit tek të rriturit ose fëmijët”.

Dëshmitë nga provat e kontrolluara të rastësishme të përfshira në rishikim, treguan se ndërsa ëmbëlsuesit pa sheqer mund t’i ndihmojnë njerëzit të humbin peshë në afat të shkurtër, ndryshimet nuk janë të qëndrueshme.

Rishikimi sugjeron gjithashtu se mund të ketë “efekte të mundshme të padëshiruara” nga përdorimi afatgjatë i ëmbëlsuesve pa sheqer, “siç është një rrezik i shtuar i diabetit të tipit 2, sëmundjeve kardiovaskulare dhe vdekshmërisë tek të rriturit”.

Ëmbëlsuesit pa sheqer përdoren gjerësisht si një përbërës në pije dhe ushqime të parapaketuara.

Në vitin 2015, OBSH lëshoi një udhëzim të besuar mbi marrjen e sheqerit, duke rekomanduar që të rriturit dhe fëmijët të reduktojnë marrjen e tyre ditore të sheqernave të shtuara në më pak se 10% të marrjes totale të energjisë. Që atëherë, interesi për ëmbëlsuesit pa sheqer është rritur, thuhet në rishikimin e ri.

Përveç kësaj, shumë zëvendësues të sheqerit janë qindra herë më të ëmbël se sheqeri i tryezës.

Udhëzimi i OBSH-së vlen për të gjithë njerëzit, përveç atyre me diabet ekzistues.

Autorët e këtij studimi thanë se rezultatet janë shqetësuese sepse ëmbëlsuesit pa sheqer shpesh u tregtohen njerëzve me diabet të tipit 2, obezitet dhe sëmundje ekzistuese kardiovaskulare, të cilët janë të gjithë në rrezik më të lartë të sulmit në zemër dhe goditjes në tru.