Njësitet e KFOR-it paraqiten në veri ku po qëndron Njësia Speciale
Njësitet e KFOR-it, kanë shkuar të hënën në zonën neutrale mes Kosovës dhe Serbisë në veri të vendit, përcjell Shqip.com.
Klan Kosova ka raportuar se ata kanë arritur në zonën ku po qëndrojnë edhe Njësia Speciale e Policisë së Kosovës.
Në fotografitë e publikuara, shihen duke patrulluar ushtarë amerikanë, polakë dhe kanadezë.
Ndërkaq, kryeministri, Albin Kurti, në një konferencë të përbashkët me kryeministrin shqiptar, Edi Rama, tha se nuk ka informacione se KFOR-i do të ndërhyjë në Veriun e Kosovës.
Ai tha se sot ka pasur një takim me komandatin e KFOR-it së bashku me ministrin e Punëve të Brendshme, Xhelal Sveçla, janë në kontakt të vazhdueshëm me institucionet ndërkombëtare.
“Sot kam pritur në takim komandantin e KFOR-it dhe bashkë me ministrin e brendshëm, Xhelal Svecla jemi në kontakt të vazhdueshëm me institucionet ndërkombëtare në Kosovë”, ka thënë Kurti.
Ndryshe, sot janë bërë tetë ditë që kur Njësia Speciale e Policisë së Kosovës janë duke qëndruar në pikat kufitare në Jarinje dhe Bërnjak, për të zbatuar reciprocitetin me target e veturave.
Për këtë, serbët që jetojnë në ato komuna, si shenjë revolte kanë bllokuar rrugët që çojnë në këto pika kufitare, duke mos lejuark ështu të kalojë asnjë veturë.
Presidenti i Serbisë, Aleksandar Vuçiq, ka deklaruar të dielën se “do i japin Prishtinës kohë që t’i përmirësojnë gabimet ose do të marrin masa”.
Kurse, ministri i Brendshëm në Serbi, Aleksandar Vulin, ka deklaruar se po pret urdhërin e Vuçiqit për ndërhyje ushtarake.
Po ashtu, gjatë dy ditëve të fundit janë parë aeroplanët ushtarak serbë duke patrulluar mbi kufirin Kosovë – Serbi.
Të shtunën është sulmuar Qendra e Regjistsimit të Automjeteve me granata dore, duke shkaktuar kështu përhapjen e zjarrit./Shqip.com