Ngritet aktakuzë ndaj zëvendësministres së MPJD-së

Prokuroria Themelore në Prishtinë ka ngritur aktakuzë ndaj zëvendësministres së Punëve të jashtme dhe Diasporës, Liza Gashit për mosdeklarim të pasurisë.

Kjo është bërë e ditur për Shqip.com nga zëdhënësja e Prokurorisë Themelore në Prishtinë, Laureta Ulaj

“Referuar pyetjes suaj, ju njoftojmë lidhur me kallëzimin penal kundër L.G., në drejtim të veprës penale ‘Mos raportimi ose raportimi i rremë i pasurisë, i të ardhurave, i dhuratave, i dobisë tjetër materiale ose i detyrimeve financiare’, nga neni 430 të KPRK-së, se Prokurori i Shtetit, pas zhvillimit të hetimeve, më 15 qershor 2022, ndaj personit të lartcekur ka ngritur aktin akuzues”, tha Ulaj.

Ndryshe, “Betimi për Drejtësi”, tri ditë më parë ka raportuar ekskluzivisht se Agjencia për Parandalimin e Korrupsionit (APK) ka ngritur kallëzim penal ndaj zëvendësministres, Liza Gashi.