Lufta në Ukrainë/ Putin humbet 70 mijë ushtarë, BBC publikon të dhënat

Më shumë se 70.000 persona që luftojnë në ushtrinë ruse kanë humbur jetën deri tani në luftimet në Ukrainë. 

BBC raporton se pjesa më e madhe e tyre janë civilë, vullnetarë që iu bashkuan forcave të armatosura pas fillimit të luftës.

Çdo ditë, emrat e të vrarëve në Ukrainë, nekrologjitë e tyre dhe fotografitë nga funeralet e tyre publikohen në të gjithë Rusinë në media dhe në rrjetet sociale.

BBC Russian dhe faqja e pavarur e internetit Mediazona i kanë mbledhur këta emra, së bashku me emrat nga burime të tjera të hapura, duke përfshirë raportet zyrtare.

Varret e reja në varreza kanë ndihmuar gjithashtu në dhënien e emrave të ushtarëve të vrarë në Ukrainë – këto zakonisht shënohen me flamuj dhe kurora të dërguara nga ministria e mbrojtjes.

BBC pretendon se ka identifikuar emrat e 70,112 ushtarëve rusë të vrarë në Ukrainë, por numri aktual besohet të jetë dukshëm më i lartë. Disa familje nuk i ndajnë publikisht detajet e vdekjeve të të afërmve të tyre, ndërsa analiza e edias britanike nuk përfshin emrat që nuk ishin në gjendje t’i kontrollonin, apo vdekjet e milicisë në Donetsk dhe Luhansk të pushtuar nga Rusia në Ukrainën lindore.

Sa për Ukrainën – ajo rrallë komenton shkallën e vdekjeve të saj në fushën e betejës. Në shkurt, presidenti Volodymyr Zelensky, tha se 31,000 ushtarë ukrainas ishin vrarë, por vlerësimet e bazuara në inteligjencën amerikane sugjerojnë humbje më të mëdha.