Kryeministri i Kroacisë: Asnjë shtet nuk e ka aneksuar Kosovën

Presidenti i Kroacisë, Zoran Milanoviq ka folur lidhur me marrëdhëniet e shtetit të tij me Serbinë e  kështu duke përmendur edhe Kosovën.

Në një konferencë për media, Milanoviq ka thënë që së bashku me komunitetin ndërkombëtar kanë aneksuar Kosovën nga Serbia.

“Deri kur do ta kuptoni se Serbia dhe Rusia janë njësoj? Ky është fatkeqësisht një fakt i dhimbshëm dhe një rrezik. Ne e aneksuam Kosovën. Ne dhe komuniteti ndërkombëtar. Ajo u aneksua nga Serbia. Kush e bëri këtë pos nesh? A e njohëm ne Kosovën? Nuk është aneksim, por rrëmbim. Kjo nuk e vë në dyshim Kosovën, por i gjithë koncepti,” tha Milanoviq.

Lidhur më këtë deklaratë ka ardhur edhe reagimi nga ana e kryeministrit të Kroacisë, Andrej Plenkoviq.

Ai ka thënë se asnjë shtet nuk e ka aneksuar Kosovën.

“Asnjë shtet nuk e ka aneksuar Kosovën. Kosova është shtet i pavarur, i pavarur i njohur nga Kroacia. Askush nuk e ka aneksuar Kosovën. Po ta kishte aneksuar dikush, do ta aneksonte në një shtet tjetër. Është e rëndësishme që Kosova të jetë e pavarur, që ne të kemi marrëdhëniet diplomatike me ta”, ka deklaruar kryeministri i Kroacisë, raporton Vecernji.

Deputetja e shqiptarëve në parlamentin e Kroacisë, Ermina Lekaj Përlaskaj, ka reaguar ndaj deklaratës së presidentit të këtij vendi, Zoran Milanoviqit se “Kosova i është vjedhur Serbisë”, duke theksuar se themelet për pavarësinë e Kosovës janë të njëjtat që çuan në pavarësinë e Kroacisë.

Sipas saj, shtetësia e Kosovës s’mund të sfidohet sepse u bë e pavarur sipas të njëjtit model si Kroacia.

Deputetja e shqiptarëve në parlamentin e Kroacisë shtoi se sfidimi i shtetësisë së Kosovës do të ishte njësoj si sfidimi ndaj Greqisë apo Bullgarisë moderne.