Krasniqi: Atletët kosovarë do ta bëjnë Algjerinë të njohë vendin tonë, gjatë Lojërave Mesdhetare
KOK ka prezantuar ekipin përfaqësues të Kosovës që do të marrin pjesë në Lojërat Mesdhetare Oran 2022.
Në ceremoninë e prezantimit ka qenë i pranishëm edhe Kryeministri i Kosovës, Albin Kurti.
Presidenti i Komitetit Olimpikë, Ismet Krasniqi, tha se kjo është një mundësi e mirë për të promovuar Kosovën në një vend që nuk e njeh pavarësinë e saj.
“Ashtu si Spanja që nuk e njeh pavarësinë e shtetit tonë njëjtë është edhe Algjeria, tek e cila do të udhëtojmë me 39 sportistë, të prirë nga Kampionia Olimpike, Distria Krasniqi, e cila bashkë me të tjerët do ta bëjë Algjerinë të njoh vendin tonë, duke e respektuar jo vetëm një herë por disa herë gjatë ceremonisë së medaljeve”, tha ai.
Nga ana tjetër Kurti kërkoi rezultate nga të gjitha sportet.
“Rezultatet e arritura në sportet e ndryshme nuk janë të rastësishme, mirëpo janë produkt i punës suaj të palodhshme. Sporti garues mbërthen në veti patriotizëm dhe qëndrueshmëri, përfaqësimi i shtetit në gara përveç që reflekton sakrificën tuaj reflekton edhe dashurinë për atdheun. Aq sa është krenari dhe e bukur është edhe përgjegjësi. Përveç në xhudo që jam i sigurt që do arrijmë rezultate, duhet të arrijmë medalje edhe në sportet e tjera”, tha ai.
Në këtë eveniment janë prezantuar dhe fanellat e Kosovës, që do të veshin atletët.
Ekipi mesdhetar i Kosovës do të përbëhet nga 39 sportistë të 13 sporteve të ndryshme për Lojërat Mesdhetare Oran 2022, të cilat prej 25 qershor deri më 6 korrik 2022, do të mbahen në qytetin e Oranit të Algjerisë.
Lista përbëhet nga xhudistja, Distria Krasniqi, Akil Gjakova, Loriana Kuka, Laura Fazliu, Bashkim Bajoku, Shpetim Bajoku, Patriot Behrami, Lorent Murati, Egzon Shala, Alban Sopa.
Kjo është hera e dytë që Kosova merre pjesë në Lojërat Mesdhetare Oran 2022, kur morri pjesë në Spanjë dhe fitoi katër medalje./Shqip.com