KPK-ja i reagon Haxhiut që tha se “po i mbyllin sytë përball skandaleve të audioincizimeve”

Këshilli Prokurorial i Kosovës ka reaguar ndaj deklaratës së ministres së Drejtësisë, Albulena Haxhiu, duke thënë se po atakohen “padrejtësisht në vazhdimësi dhe në mënyrë të paarsyeshme”.

Haxhiu deklaroi të mërkurën se Ministria e Drejtësisë patjetër që do raporte të mira me Këshillin Prokurorial të Kosovës dhe atë Gjyqësor, por sipas saj, e ka të pamundur t’i mbështesë “kur këto institucione heshtin përball skandaleve siç ishte ai i audio-incizimeve” të publikuara nga Shqip.com.

E ndaj kësaj deklarate ka reaguar KPK-ja dukë thënë se s’kanë nevojë të mbështeten nga askush, aq më pak nga pushteti ekzekutiv, “sepse Këshillin Prokurorial dhe Prokurorin e Shtetit i mbron Kushtetuta dhe ligjet në fuqi, e jo vullnetet politike”.

“Ndihma që pushteti ekzekutiv mund t’i japë sistemit prokurorial është propozimi i ligjeve adekuate në koordinim dhe bashkëpunim me Këshillin Prokurorial dhe Prokurorin e Shtetit për të avancuar pozitën e këtyre institucioneve dhe për t’i plotësuar nevojat e tyre në realizimin e mandatit kushtetues dhe ligjor, ashtu siç është e përcaktuar edhe me ndarjen e pushteteve”, thuhet në reagimin e tyre.

Gjatë konferencës, Haxhiu tha se po punojnë që të “kthejmë besimin e qytetarëve në sistemin e drejtësisë”.

E sipas KPK-së, një gjë e tillë “nuk mund të fitohet duke i atakuar këto institucione çdo ditë me pretendime të caktuara dhe të dhëna të pasakta dhe të pabazuara, sepse kjo nuk i kontribuon bashkëpunimit të institucioneve”.

“Edhe sot ia bëjmë me dije opinionit publik dhe Ministres së Drejtësisë, se pagesat e ekspertëve mjekoligjorë janë realizuar në bazë të akteve ligjore dhe nënligjore, të nxjerra nga Kuvendi dhe Qeveria e Republikës së Kosovës. Po ashtu, ekspertët mjekoligjorë janë zyrtarë që veprojnë në kuadër të Ministrisë së Drejtësisë, prandaj ne iu kemi drejtuar kësaj ministrie me qëllim të rishikimit të Udhëzimit Administrativ, ngase Prokurori i Shtetit e ka të pamundur të realizojë mandatin e tij pa ekspertizat e tyre”.

“Në vend të atakimeve, denigrimeve dhe dezinformatave për institucionet e pavarura, në këtë rast ndaj KPK-së, Ministria e Drejtësisë duhet të punojë që sa më parë t’i nxjerrë aktet e nevojshme nënligjore që rregullojnë këtë çështje, ngase Këshilli Prokurorial i Kosovës është i obliguar të vazhdojë të kompensojë shërbimet e ekspertëve mjekoligjore në bazë të akteve nënligjore aktuale”.

Sipas KPK-së, shpenzimet e ekspertëve bien në barrë të të pandehurve që shpallen fajtorë me aktgjykim të formës së prerë nga ana e gjykatave.

“Këshilli Prokurorial i Kosovës nuk përzgjedh ekspertët mjekoligjorë për të bërë ekspertizat e tyre profesionale, por ata caktohen nga Instituti i Mjekësisë Ligjore, i cili është në kuadër të Ministrisë së Drejtësisë dhe kjo bëhet sipas “miqësive” brenda këtyre dy institucioneve”. 

Ndërsa, lidhur me audio-incizimet e publikuara nga Shqip.com, KPK-ja thotë se deklarata e Haxhiut se “Këshilli Prokurorial i Kosovës dhe Prokurori i Shtetit janë duke i mbyllur sytë prapa skandaleve të audioincizimeve” nuk qëndrojnë.

Sipas njoftimit, “KPK-ja menjëherë ka filluar proceduat disiplinore ndaj një prokurori, ndërsa Prokurori i Shtetit ka ndërmarrë veprimet e veta lidhur me këto audioincizime në përputhje me dispozitat kushtetuese dhe ligjore”. 

“Sistemi prokurorial e ushtron mandatin e vet dhe do ta ushtrojë çdo herë në përputhje me Kushtetutën dhe ligjet në fuqi dhe asnjëherë sipas dëshirave të konferencave për media dhe deklarimeve të pabazuara dhe joprofesionale të kujtdoqofshin ato”.  

“Këshilli Prokurorial mbetet i përkushtuar për të rritur bashkëpunimin ndërinstitucional, por jo në formën dhe mënyrën të cilën e ka zgjedhur Ministria e Drejtësisë”.

Ndaj deklaratës së Haxhiut ka reaguar edhe Këshilli Gjyqësor i Kosovës./SHQIP.com