Kosova U19 grumbullohet para ndeshjeve kualifikuese për Euro 2023

Kombëtarja e Kosovës U19 ka filluar përgatitjet për ndeshjet kualifikuese për Kampionatin Evropian “Malta 2023”.
“Dardanët” e rijnë do të garojnë më 17, 20 e 23 nëntor të këtij viti.
Trajneri, Ramiz Krasniqi, ka theksuar se qëllimi i grumbullimit është të testojë talentet vendor.
“Në këtë grumbullim janë 80% futbollistë vendor dhe duam të shohim formën dhe përgatitjen e tyre. Fati i keq është se një grup i futbollistëve pas turneut në Itali kanë mbetur me menaxherët e tyre në kërkim të klubeve të ndryshme dhe kjo ka zgjatur gati 3 muaj. Të njëjtit futbollistë nuk kanë qenë në kontinuitet të ndeshjeve, të përgatitjes fizike dhe automatikisht kjo është shfaqur në formën e tyre. I kam përcjell ndeshjet e tyre dhe u kam treguar se jam i pakënaqur dhe u kam kërkuar ta rikthejnë formën, sepse përndryshe nuk do të udhëtojnë në Suedi. E pikërisht ky grumbullim është një test për të parë e kanë rikthyer formën”, ka theksuar Krasniqi.
Kosova U19 është në Grupin 3, bashkë me Ukrainën, Suedinë dhe Qipron.
Ndeshjet e këtij grupi do të zhvillohen në Suedi, më dy skuadrat e para të grupit kalojnë në “Elite Round”, së bashku me skuadrën e tretë më të mirë nga 13 grupet e kësaj faze eliminatore.
/Shqip.com