Ish-prokurori i përgjithshëm i Meksikës është arrestuar lidhur me zhdukjen e 43 studentëve

Ish-prokurori i përgjithshëm i Meksikës u arrestua të premten në lidhje me zhdukjen e 43 studentëve në vitin 2014 , një tragjedi që tërhoqi vëmendjen e botës gati tetë vjet më parë.

Siç raporton CNN, zyra e prokurorit tha në një deklaratë se e konsideron ish-prokurorin e përgjithshëm Jesús Murillo Karam të dyshuar për “krimet e zhdukjes me forcë, torturës dhe kundër administrimit të drejtësisë”.

Murillo Karam nuk i bëri rezistencë arrestimit, shtohet në deklaratë.

Arrestimi i tij vjen një ditë pasi një komision qeveritar i së vërtetës tha se zhdukja e studentëve ishte një “krim i shtetit”, në një raport të bazuar në mijëra dokumente, mesazhe, regjistrime telefonike, dëshmi dhe forma të tjera prova.

Studentët kishin vizituar qytetin jugperëndimor të Iguala nga një kolegj mësuesish në Ayotzinapa kur autobusi i tyre u kap nga policia lokale dhe forcat ushtarake federale në shtator 2014.

Nuk dihet saktësisht se çfarë ndodhi më pas, pasi shumica e studentëve të zhdukur nuk u gjetën kurrë. 

Megjithatë, autobusët e mbushur me plumba u panë më vonë në rrugët e qytetit, me xhama të thyer dhe gjak.

Të mbijetuarit nga grupi fillestar prej 100 personash thanë se autobusët e tyre ishin ndaluar nga oficerë policie dhe ushtarë të armatosur, të cilët papritmas hapën zjarr.

Sipas komisionit, ishin anëtarë të “grupit kriminal Guerreros Unidos dhe agjentë nga institucione të ndryshme të shtetit meksikan” që u përfshinë në zhdukjen, tha nënsekretari i Meksikës për të Drejtat e Njeriut Alexander Encinas.

Rasti i studentëve të zhdukur ndezi zemërim ndërkombëtar dhe presidenti i atëhershëm Enrique Peña Nieto u kritikua për mungesën e transparencës në hetimin e çështjes.

Murillo Karam ishte në krye të zyrës së Prokurorit të Përgjithshëm në atë kohë dhe drejtoi hetimin e shtetit për zhdukjen. CNN po përpiqet të përcaktojë nëse Murillo Karam ka përfaqësim ligjor dhe se si ai pranon akuzat.

Presidenti aktual Andrés Manuel López Obrador, qeveria e të cilit krijoi komisionin qeveritar të së vërtetës, është zotuar të zbulojë se çfarë ndodhi saktësisht me studentët e zhdukur.

Autoritetet kanë nxjerrë vetëm trupat e tre studentëve; megjithatë, komisioni tha se nuk ka gjasa që ndonjë student i zhdukur të jetë ende gjallë. “Nuk ka asnjë tregues se studentët janë gjallë. Përkundrazi, të gjitha dëshmitë dhe provat vërtetojnë se ata janë vrarë dhe zhdukur me dinakëri,” tha Encinas.

Raporti i komisionit përshkruan një mbulim të thellë, duke përfshirë nivele të shumta të zyrave të qeverisë lokale dhe federale. Zyrtarët fshehën fakte dhe mbuluan lidhjet midis autoriteteve dhe bandave, thuhet në raport.

“Në çdo kohë, autoritetet federale, shtetërore dhe komunale ishin në dijeni të lëvizjeve të studentëve. Veprimet, mosveprimet dhe pjesëmarrja e tyre lejuan zhdukjen dhe ekzekutimin e studentëve,” thuhet në raport./Shqip.com