“I refuzova tre milionë euro nga Kazakistani, nuk do pendohem kurrë”

Tre milionë euro ishte shuma që Majlinda Kelmendi i refuzoi nga Kazakistani, vetëm që ta përfaqësojë Kosovën.

Këtë lajm e kanë treguar, vetë Kelmendi, në një prononcim për T7.

“Jo nuk kam qenë pishman asnjëherë dhe nuk do pendohem kurrë.  E kamë ditë për ofertën nga Kazakistani. E vështirë ka qenë kur Azerbajxhani më bëri ofertë sepse askush nga familja ime nuk punonte atëherë. Toni më tha se duhet me qëndru në Kosovë sepse është vendi i jonë.

Jam shumë e vetëdijshme se tre milionë euro në Kosovë nuk do i marr kurrë. Por, mënyra se si ndihem në Kosovë, si më shohin njerëzit në Kosovë nuk mundem t’i blejë kurrë”, tha Kelmendi ndër të tjera.

Të njëjtën e tha edhe trajneri dhe bashkëpuntori i saj i ngushtë, Driton Kuka.

“Tre milionë euro do i dilnin Majlindës në xhirollogari nëse do pranonte ta ndërronte shtetin. Majlinda e ka ditur ofertën, por jo edhe shumën. I tregova pas kompeticionit”, tha Kuka.

Ai po ashtu shtoi se, kanë pasur edhe oferta nga Turqia dhe disa shtete tjera.

Majlinda, u pensionua nga xhudo gjatë ditës së hënë dhe u përcoll me ceremoni shtetërore.

Gjatë karrierës si profesioniste, ajo e ka “sunduar” botën dy herë, ishte katër herë “mbretëreshë” e Evropës dhe doli fituese e katërfishtë në Grand Slamin e Parisit. /Shqip.com