Hoti e quan fat fitimin e projekteve nga MAPL-ja në katër komunat në të cilat qeverisë VV-ja
Shqip
Ish-kryeministri i Kosovës, Avdullah Hoti, ka reaguar për një vendim të Qeverisë së Kosovës duke thënë se nga shtatë komunat të cilat kanë fituar projekte nga Ministria e Administrimit dhe Pushtetit Lokal, katër prej tyre drejtohen nga Vetëvendosje.
Përmes një postimi në Facebook, ai e quan fat që katër komunat në të cilat qeverisë Vetëvendosja është fituar projekti.
“Nga 7 komuna që kanë fituar projekte nga Ministria e Pushtetit Lokal, 4 janë nga VV. Në nivel nacional, VV qeveris në 4 komuna prej 38 sa janë. Por të gjitha kanë arritur të fitojnë projekte nga Qeveria. Çfarë fati!”, shkroi Hoti.
Në vendimin e Qeverisë, përfituese të projekteve janë Komuna e Klinës, Gjilanit, Obiliqit, Podujevës, Shtimes, Istogut dhe Kamenicës.
Ndryshe, Qeveria e Kosovës në mbledhjen e mbajtur me 10 gusht 2022 kishte miratuar dhënien e mjeteve financiare me vlerën e mbi një milion eurove për Ministrinë e Administrimit të Pushtetit Lokal.
Kjo shumë është paraparë për projektin, “Programi komunal për zhvillim të infrastrukturës socio-ekonomike dhe bashkëpunim ndër-komunal”./Shqip.com
