Holanda tregon pse nuk përkrah liberalizimin e vizave për Kosovën

Ministria e Jashtme e Holandës ka arsyetuar mospërkrahjen e procesit të heqjes së vizave për kosovarët me faktin se lufta e Kosovës kundër nivelit të lartë të korrupsionit nuk është mjaft bindëse.

Zëdhënësja e Ministrisë së Punëve të Jashtme e këtij vendi, Tessa Van Staden, ka deklaruar së Këshilli i Bashkimit Evropian vendos për liberalizimin e vizave për Kosovën dhe se më vendimin e tyre është pajtuar edhe Holanda.

“Siç e dini, liberalizimi i vizave është një proces teknik, i drejtuar nga standardet, në të cilin një vend duhet të përmbushë të gjitha ato në një mënyrë të qëndrueshme përpara se Këshilli të vendosë t’i heqë vizat. Kur Komisioni Evropian raportoi për herë të fundit për këtë, Holanda arriti në përfundimin se konkluzionet e Komisionit mbi historikun e Kosovës në luftën kundër nivelit të lartë të korrupsionit dhe krimit të organizuar nuk ishin mjaft bindëse”, ka shtuar ajo për ‘KK’.

Van Staden thekson se Holanda është e inkurajuar nga planet e Qeverisë së Kosovës në luftë kundër krimit të organizuar dhe korrupsionit.

Ajo shtoi se e rëndësishme për shtetin holandez nuk është vetëm që korrupsioni i nivelit të lartë të ndiqet penalisht, por edhe të zbatohen në mënyrë efektive dënimet e atyre që janë përgjegjës.

“Kjo u nënvizua gjithashtu në Raportin e Progresit të vitit 2020 nga Komisioni Evropian. Është e rëndësishme që të rritet efikasiteti i sektorit gjyqësor dhe të zbatimit të ligjit. Duhet të ndodh një përmirësim strukturor për një periudhë më të gjatë kohore. Kosova mund të llogarisë në mbështetjen tonë përmes projekteve, këshillave dhe ekspertëve për të arritur këto rezultate të qëndrueshme”, ka përfunduar ajo./SHQIP.com