Harry fiton padinë për shpifje kundër tabloidit të Mbretërisë së Bashkuar, Mail

Lajmi që pretendonte se Princi Harry u përpoq të mbante sekret një sfidë ligjore kundër një departamenti të qeverisë britanike ishte “shpifëse”.

Kështu vendosi të premten një gjykatës i Gjykatës së Lartë në Mbretërinë e Bashkuar, shkruan CNN.

Duka i Sussex po padit Associated Newspapers Limited (ANL) pasi një nga botimet e saj, Mail on Sunday, publikoi një histori në lidhje me një çështje të veçantë të Gjykatës së Lartë të Dukës, kundër Ministrisë së Brendshme të Mbretërisë së Bashkuar në lidhje me marrëveshjet e sigurisë kur ai dhe familja e tij vizitojnë vendin.

Artikulli, i cili ende shfaqet në faqen e internetit të gazetës, u botua në shkurt me titullin:

“Ekskluzive: Si Princi Harry u përpoq ta mbante sekret luftën e tij ligjore me qeverinë për truprojat e policisë… më pas – vetëm disa minuta pasi historia u publikua – Makina e tij PR u përpoq t’i jepte një kthesë pozitive mosmarrëveshjes.”

Në një deklaratë me shkrim në një seancë paraprake muajin e kaluar, avokatët e dukës argumentuan se pjesa në mënyrë të rreme sugjeronte se Harry kishte “gënjyer” dhe “në mënyrë të pahijshme dhe cinike u përpoq të manipulonte dhe ngatërronte opinionin publik”, sipas agjencisë së lajmeve PA Media.

 Avokatët për ANL hodhën poshtë pretendimet dhe thanë se nuk kishte “asnjë aluzion të pahijshme në ndonjë lexim të arsyeshëm të artikullit”./Shqip.com