Haradinaj: U evitua përshkallëzimi i situatës

Kreu i AAK-së, Ramush Haradinaj, ka deklaruar në Kuvendin e Kosovës se me marrëveshjen e arritur për targat, në plotësi është evituar rreziku për përshkallëzimin e situatës në veri të vendit.

Sfidë sipas Haradinaj mbetet kthimi i zyrtarëve serbë që e kanë lënë punën në institucione.

“Kemi disa ditë që kemi drejtuar situatën në veri. Me marrëveshjen e djeshme e kemi evituar rrezikun e parë që mund të kishte viktima qofshin policë apo qytetarë serbë. Por dje me marrëveshjen nuk është zgjidhur situata në veri.

Sfida që na pret është rikthimi i atyre që i kanë lëshuar vendet e punës apo plotësimi i pozitave. Qeveria duhet të fillojë dialogun me serbët lokalë”, ka thënë ai në seancën e Kuvendit.

Tutje, i pari i AAK-së, ka theksuar se nuk është mirë të eksperimentohet me ndërkombëtarët.

“Në interpelancën e ardhshme me kryeministrin do të bisedojmë për dy pika që i kemi në rezolutën tonë. E kam ditur që do të vijmë deri te kjo pikë meqë e kam lexuar Lajçakun e Escobarin kur qenë këtu se tërësia territoriale nuk është e negociueshme, sovraniteti nuk është i negociueshëm prandaj mos të eksperimentojmë”, ka theksuar Haradinaj.

Të gjitha zhvillimet rreth marrveshjes se arritur gjeni ne permbledhjen LIVE