Haradinaj: Kërkesa amerikane për shtyrjen e vendimit dëshmon se Qeveria nuk i ka njoftuar paraprakisht

Ish-ministrja e Ministrisë së Punëve  të Jashtme Meliza Haradinaj, ka thënë se kërkesa e Amerikës për shtyrje të vendimit për targa tregon se Qeveria e Kosovës nuk i ka njoftuar ata paraprakisht.

Përmes një postimi në Facebook, Haradinaj tha se vendimet impulsive në qeverisje në të shumtën e rasteve janë të dëmshme.

“Kërkesa amerikane për shtyrje 30 ditëshe të implementimit të vendimit për targa dëshmon se Qeveria nuk qenka koordinuar (lexo: NUK i ka njoftuar paraprakisht) partnerët ndërkombëtar për planin e veprimit. Vendimet impulsive në qeverisje në të shumtën e rasteve janë të dëmshme”, shkroi Haradinaj.

Tutje, Haradinaj tha se moskoordinimi për çështje të sigurisë me partnerët e ngushtë po i dobëson deri në atë pikë sat ë zmbrapsen turpshëm para Serbisë.

“Moskoordinimi për çështje të sigurisë me partnerët e ngushtë (sidomos SHBA), duke besuar se forcon sovranitetin dhe vetëvendosjen politike, në realitet po na dobëson duke u detyruar të zmbrapsemi turpshëm përballë Serbisë (e Rusisë)”.

Qveria e Kosovës ka marrë vendim që të shtyej për datën 1 shtator masat e reciprocitetit me Serbinë për targat dhe dokumentet.

Ky vendim, siç njofton Qeveria ka ardhur pas bisedimeve me faktorët ndërkombëtarë, amerikanë dhe evropianë.

‘Kryeministri Kurti së bashku me Presidenten Osmani dhe zëvendës kryeministrat Bislimi e Gërvalla kanë zhvilluar kontakte e takime me faktorët ndërkombëtarë amerikanë dhe evropianë. Me këtë rast, Qeveria e Kosovës jep zotimin që të shtyhet zbatimi i dy vendimeve të datës 29 qershor 2022, deri me datën 1 shtator 2022, nga momenti në ditën e hënë, 1 gusht 2022, kur do të hiqen të gjitha barrikadat dhe të vendoset liria e plotë e lëvizjes në të gjitha rrugët në veri të Kosovës”, thuhet në njoftim.

Lexo edhe:

KFOR: Siguria në veri është e tensionuar, jemi të gatshëm të ndërhyjmë

Serbët lokalë në veri të Kosovës kanë bllokuar me kamionë, dhe me mjete tjera, rrugët që çojnë drejt dy pikëkalimeve kufitare që lidhin Kosovën dhe Serbinë – Jarinjë dhe Bërnjak.

Protesta e serbëve lokalë vjen një ditë para se të hyjnë në fuqi dy vendimet e Qeverisë së Kosovës, që kanë të bëjnë me targat dhe dokumentet serbe.

Sipas vendimit të Qeverisë, të gjithë qytetarët e Serbisë që do të hyjnë në territorin e Kosovës do të pajisen me një dokument të hyrje-daljes, që do të jetë i vlefshëm për 90 ditë.

Me një dokument të tillë, qytetarët e Kosovës pajisen qe 11 vjet, sa herë që hyjnë në territorin e Serbisë./Shqip.com