Foto / Banorët e Kievit e kalojnë natën në qiell të hapur si pasojë e sulmeve ruse
Shqip
Sulmi i dytë raketor i Rusisë në Kiev gjatë kësaj jave plagosi të paktën 51 persona, dëmtoi shumë shtëpi, ndërtesa banimi dhe një spital për fëmijë, thanë zyrtarët ukrainas më 13 dhjetor.
Ukraina pohoi në Telegram se kishte rrëzuar 10 raketa balistike që synonin kryeqytetin.
Shumë njerëz u lënduan nga shpërndarja e copave të raketave si pasojë e sulmit që shkaktoi shkatërrime në katër rrethe të Kievit përgjatë lumit Dnjepër, i cili përshkon kryeqytetin, thanë zyrtarët.
Copat e raketave gjithashtu dëmtuan dritaret dhe dyert e një spitali për fëmijë në zonën Dnjiprovski të Kievit, por nuk pati të lënduar, shkroi kryebashkiaku Vitali Klitschko në Telegram.
Copat e raketave balistike goditën gjithashtu disa ndërtesa banimi në distriktin Dnjiprovski, duke plagosur të paktën 51 persona, përfshirë gjashtë fëmijë, tha në Telegram kreu i administratës ushtarake të Kievit, Serhiy Popko. Nga këto sulme u dëmtua edhe ujësjellësi i qarkut.
Kreu i administratës ushtarake të Kievit, Serhiy Popko, tha se shumica e lëndimeve u shkaktuan nga dritaret e thyera nga vala e shpërthimit. “Ka shumë të lënduar”, tha ai, duke sugjeruar se numri i të plagosurve mund të rritet.
Si Moska, ashtu edhe Kievi, mohojnë të kenë shënjestruar civilët në luftën gati 22-mujore që Rusia nisi kundër fqinjit të saj në shkurt të vitit 2022. /REL
/Shqip.com
