DASH shpreson për një zgjidhje për targat “në ditët në vijim”

Shtetet e Bashkuara thanë se shpresojnë që Kosova dhe Serbia të zgjidhin çështjen e targave në mënyrë paqësore “gjatë ditëve në vijim”.

Kështu ka thënë në një adresim për mediat, zëdhënësi i Departamentit, Ned Price, i cili tha se kjo është arsyeja pse i dërguari i SHBA-së, Gabriel Escobar, ishte në Prishtinë dhe në Beograd.

“E mbështesim plotësisht dialogun e ndërmjetësuar nga BE-ja. Kjo është arsyeja pse i dërguari i SHBA-së, Gabriel Escobar, ishte në Prishtinë dhe në Beograd për të mbështetur këtë proces. Siç e dini, edhe vetë Sekretari ka qenë thellësisht i angazhuar në këtë. Ai foli me presidentin serb Vuçiq dhe kryeministrin e Kosovës Kurti në fillim të këtij muaji, më 11 tetor”.

“Ne do të vazhdojmë ta mbështesim atë dialog të BE-së. Ne do të vazhdojmë të jemi partner si për Kosovën ashtu edhe për Serbinë me shpresën se ato mund ta zgjidhin këtë mosmarrëveshje në mënyrë paqësore gjatë ditëve në vijim”, tha Price për The Pavlovic Today.

Më 1 shtator, autoritetet në Kosovë nisën procesin e riregjistrimit të makinave me targa të lëshuara nga Serbia, në ato RKS- Republika e Kosovës – pas shtyrjes për një muaj.

Me 31 dhjetor ky proces pritet të përmbyllet.

SHBA-ja, por edhe Bashkimi Evropian kanë kërkuar nga Kosova dhe Serbia të shmangin tensionet, teksa po afrohet data 31 tetor.

Bashkimi Evropian i ka dhënë mbështetje kërkesës së Shteteve të Bashkuara të Amerikës drejtuar Kosovës, që ta shtyjë aplikimin e vendimit për targat.

Në një përgjigje për Shqip.com, zëdhënësi i BE-së, Peter Stano ka deklaruar se Bashkimi Evropian ka kërkuar nga Qeveria e Kosovës që marrëveshja për targat të shtyhet për 10 muaj.

“BE-ja ka qenë gjithmonë e qartë se vendimi i Kosovës për riregjistrimin e targave është legjitim. Që nga fillimi i këtij procesi, ne i kemi rekomanduar qeverisë së Kosovës që të vendosë një periudhë 12 mujore për riregjistrimin. Duke ndjekur të njëjtin arsyetim, tani po kërkojmë nga qeveria e Kosovës që të shtyjë afatin ekzistues për 10 muaj. Duhet të shmanget përshkallëzimi i tensioneve dhe, potencialisht, dhuna në veri të Kosovës. Kjo është e një rëndësie të veçantë në kontekstin aktual gjeo-politik, në funksion të ruajtjes së stabilitetit në rajon” ka thënë nga BE-ja për Shqip.com

Reagimi i BE-së vjen dy ditë pas kërkesës së të dërguarit të posaçëm të SHBA-ve për Ballkanin Perëndimorë, Gabriel Escobar që Qeveria e Kosovës të shtyjë për 10 muaj vendimin për targat.