Borrell: Presidentët e Kinës dhe Brazilit të vizitojnë Ukrainën para se të flasin për paqen

Presidenti i Kinës, Xi Jinping, dhe ai i Brazilit, Lula da Silva, duhet të udhëtojnë në Ukrainë dhe ta shohin luftën “me sytë e atyre që janë bombarduar” nga forcat ruse përpara se të angazhohen në ndonjë përpjekje të mëtejshme për promovimin e paqes, ka thënë Përfaqësuesi i Lartë i BE-së për Punët e Jashtme dhe Politikën e Sigurisë, Josep Borrell.

Si Kina ashtu edhe Brazili e kanë pozicionuar veten si ndërmjetës të mundshëm të paqes në luftë, por pikëpamjet e tyre janë kritikuar gjerësisht nga aleatët perëndimorë si të njëanshëm, të paplotë dhe me prirje ruse.

Një dokument prej 12 pikash i propozuar nga Kina bëri thirrje për ndërprerjen e armiqësive dhe mbrojtjen e termocentraleve bërthamore, por nuk pranoi pushtimin e territoreve të Ukrainës.

Edhe pse u prit keq në Perëndim, plani i Pekinit u mirëprit nga presidenti i Brazilit Lula da Silva, i cili ditët e fundit tërhoqi polemika për sugjerimin që SHBA dhe BE-ja po nxisnin luftën përmes furnizimeve të tyre të vazhdueshme me armë në Ukrainë.

Pas një takimi të ministrave të punëve të jashtme në Luksemburg, Josep Borrell lëshoi ​​qortimin e tij personal kundër të dy vendeve.

“Dua të kujtoj situatën e tmerrshme në terren për të gjithë njerëzit që po bëjnë thirrje për paqe tani. Unë po bëj thirrje për paqe gjithashtu”, ka thënë mes tjerash Borrell.