Billboard: Pas mosmarrëveshjeve politike, babai i Dua Lipës zhvendos festivalin ”Sunny Hill” nga Kosova

Një festival ndërkombëtar muzikor i themeluar nga babai i këngëtares – kantautores Dua Lipa për të promovuar vendlindjen e tij Kosovën, është zhvendosur nga Prishtina në Tiranë.

Kështu ka nisur shkrimin revista prestigjioze, Billboard.

Festivali “Sunny Hill” bëri debutimin e tij në kryeqytetin e Kosovës, Prishtinë, në vitin 2018 dhe u mbajt sërish një vit më vonë, në 2019, duke sjellë artistë si Miley Cyrus, Calvin Harris, Martin Garrix dhe Action Bronson – në një nga vendet më të reja dhe më të varfra të Evropës.

Dukagjin Lipa , babai dhe menaxheri i këngëtares, tha se festivali i solli Kosovës publicitet të paçmuar, duke përfshirë mbulimin në më shumë se 500 media ndërkombëtare. Ngjarja u pezullua në 2020 dhe 2021 për shkak të pandemisë së koronavirusit.

Është vendosur të rikthehet këtë verë, por Lipa tha të martën vonë se “pas një pritjeje të gjatë, shumë përpjekjeve, kërkesave”, ai kishte marrë “një vendim të vështirë por të nevojshëm” për të organizuar ngjarjen 4-7 gusht në kryeqytetin e Shqipërisë, Tiranë.

Ai tha se një mosmarrëveshje politike midis partisë në pushtet në nivel qendror në Kosovë (Vetëvendosje), dhe asaj në pushtet lokal në Prishtinë (LDK) i pengoi organizatorët të merrnin lejen për të mbajtur festivalin.

Ai dhe drejtorët e tjerë të festivalit kishin kaluar tre vjet duke u përpjekur të bindnin qeverinë që t’i lejonte ata të menaxhonin një sipërfaqe prej 17 hektarësh dhe të ndërtonin infrastrukturën e duhur për festivalin vjetor.

Kryetari i Prishtinës, Përparim Rama favorizoi mbajtjen e festivalit muzikor. Ai e akuzoi Qeverinë se e ka vonuar vendimin për dhënien e pronës.

Ministri i Kulturës, Hajrulla Çeku, tha se pengesa erdhi nga organizatorët e festivalit që kërkonin një parcelë në shfrytëzim për 99 vjet.

Qeveria nuk mund të nxitonte në një marrëveshje të tillë dhe “procesi i vendimmarrjes kërkon kohë që të jetë i plotë dhe jo i gabuar apo abuziv”, tha Çeku./SHQIP.com