Ankthi mund të largohet nëse ushqeheni si duhet

Ankthi këto kohët e fundit është i pranishëm më shumë se kurrë e njerëzit po përpiqen fort të mos e humbasin toruan.

Sipas ekspertëve, një regjim ushqimor i balancuar mund të ndihmojë shumë në rikthimin e ekuilibrave hormonalë por edhe sheqerit në gjak, gjë që kontribuon në mirëqenien tonë emocionale.

Ushqyerja e shëndetshme sipas ekspertëve, ka fuqinë të shtojë harenë dhe kënaqësinë për jetën.

Cilat janë ushqimet që zbusin ankthin?

Ekspertët japin shumë këshilla për eliminimin dhe zbutjen e ankthit nëpërmjet përzgjedhjes së ushqimeve të caktuara të dobishme për gjendjen tonë emocionale.

Peshku

Salmoni i egër, skumbria, trofta dhe sardelet janë shumë të pasura me zink, një ushqyes shumë i rëndësishëm për njerëzit që vuajnë nga ankthi.

Për më tepër, ato ofrojnë acide yndyrore omega-3 të cilat luajnë një rol jetësor për shëndetin e trurit.

Turshitë

Ushqimet e fermentuara në kushtet e shtëpisë, siç janë lakra turshi, kosi, kefiri apo kastravecat turshi ndikojnë në uljen e niveleve të ankthit.

Frutat dhe perimet

Prodhimet e freskëta të tokës janë një burim i shkëlqyer antioksidantësh.

Nivelet e ulëta të tyre kontribuojnë në rritjen e niveleve të ankthit.

Besohet se ngrënia e frutave dhe perimeve në mënyrë të rregullt rikthen qetësinë shpirtërore.

Kujdes me alkoolin dhe kafeinën.

Alkooli mund të ketë një efekt të përkohshëm qetësues por kur ai përpunohet në organizëm, ndikon negativisht në cilësinë e gjumit.

Kafeina ndikon njerëzit në mënyra të ndryshme por në përgjithësi i bën disa prej tyre nervozë dhe të acaruar.

Uji

Sipas ekspertëve, njerëzit duhet të sigurohen të pinë mjaftueshëm ujë që të shmangin dehidratimin dhe më pas nivelet e rritura të ankthit.