Angili në takim me Konjufcën: Turqia mbështetë anëtarësimin e Kosovës në NATO dhe KiE
Kryetari i Kuvendit të Kosovës, Glauk Konjufca, priti sot në takim ambasadorin e ri të Turqisë në Kosovë, Sabri Tunç Angılı.
Sipas njoftimit të Kuvendit të Kosovës, në këtë takim, Konjufca uroi ambasadorin për detyrën e re.
“Me këtë rast, Kryetari Konjufca uroi ambasadorin Angılı për detyrën e re dhe vuri në dukje se marrëdhëniet mes Republikës së Kosovës dhe Republikës së Turqisë janë shumë të mira e se ato bazohen në miqësi të kamotshme, partneritet strategjik dhe respekt të ndërsjellë. Gjithashtu i shprehu ngushëllime për viktimat e tërmeteve që goditën Turqinë, duke theksuar se populli i Kosovës qëndron pranë popullit turk në këto ditë të vështira”.
Ambasadori i Turqisë në Kosovë shprehu mbështetjen e tyre për anëtarësimin e Kosovës në NATO dhe Këshillin e Evropës.
“Kryetari i Kuvendit vlerësoi lart mbështetjen e vazhdueshme që ky vend mik i ka dhënë dhe vazhdon t’i japë shtetit të Kosovës. Ambasadori Angılı e falënderoi Kryetarin e Kuvendit për pritjen dhe njëherësh ritheksoi vazhdimin e përkrahjes së Turqisë për anëtarësimin e Kosovës në Këshillin e Evropës dhe në NATO, por edhe në institucione dhe organizma tjerë ndërkombëtarë”.
Tutje, thuhet se Konjufca dhe ambasadori Angılı shprehën gatishmërinë për intensifikimin e bashkëpunimit të gjithanshëm dhe forcimin e mëtejshëm të marrëdhënieve dypalëshe mes dy vendeve.
/Shqip.com
