Agim Ademi kërkesë për komunat: Klubeve t’u ndahet toka për ndërtimin e stadiumeve për 99 vjet

Presidenti i Federatës së Futbollit të Kosovës, Agim Ademi ishte në vizitë të dielën nëpër stadiumet dhe fushat e ndryshme të klubeve kosovare, për t’u njohur nga afër me gjendjen e tyre.

Ai vizitoi stadiumet në Gjilan, Ferizaj dhe Suharekë, me ç’rast edhe u bëri thirrje komunave që klubeve t’u jepen në shfrytëzim për 99-të vite.

Madje, Ademi përmendi rastin e festivalit ‘Sunny Hill’ si shembull që duhet ndjekur edhe për stadiumet e klubeve të futbollit.

“Po ashtu, u sugjeroj klubeve përkatëse që veprojnë në këto stadiume që të kërkojnë nga komunat ku e zhvillojnë aktivitetin që t’u jepen stadiumet në shfrytëzim në afat të gjatë prej 99 vjetësh (siç u veprua në Komunën e Prishtinës, që iu nda toka festivalit ‘Sunny Hill’ për 99 vjet)”, ka shkruar ai në Facebook.

Ademi shtoi se kjo metodë ka filluar të zbatohet dhe se i jep mundësi FFK-së, UEFA-s dhe FIFA-s të investojnë në stadiume.

“Konsideroj se kjo është një metodë me të cilën duhet të veprohet edhe për stadiumet e futbollit dhe jam i lumtur që ky ligj ka filluar të të zbatohet në praktikë nga Kuvendet Komunale, pasi kjo na jep mundësi neve si FFK që të investojmë me fondet e UEFA-s dhe FIFA-s në këto stadiume”, ka shkruar i pari i FFK-së.

Ademi i bëri kërkesë të njëjtë edhe kryetarit të Suharekës, Bali Muharremaj, që të vazhdojë me investime dhe që FC Ballkanit t’i jepet toka e stadiumit në shfrytëzim për 99-të vite.

“I lutem kryetarit të kësaj komune, Bali Muharremaj që të vazhdojë edhe më tutje me investime në infrasturkturën e futbollit dhe të çojë përpara procesin që FC Ballkanit t’i jepet në shfrytëzim për 99 vjet parcela për ndërtimin e stadiumit”, ka theksuar ai më tutje në Facebook.

Përndryshe, Agim Ademi po ashtu bëri thirrje për ndërtimin e reflektorëve nëpër stadiume, në mënyrë që ndeshjet të zhvillohen përgjatë mbrëmjeve. /Shqip.com