OBSH ka verifikuar 18 sulme në objektet shëndetësore në Ukrainë

Organizata Botërore e Shëndetësisë (OBSH) ka verifikuar 18 sulme në objektet e kujdesit shëndetësor në Ukrainë deri më tani, ka njoftuar të mërkurën Drejtori i Përgjithshëm Tedros Adhanom Ghebreyesus.

“Deri më tani, OBSH ka verifikuar 18 sulme ndaj objekteve shëndetësore, punonjësve shëndetësorë dhe ambulancave, duke përfshirë dhjetë vdekje dhe 16 lëndime”, tha Tedros në një konferencë për media, shkruan CNN.

“Më shumë se 2 milionë njerëz janë larguar nga Ukraina dhe OBSH po mbështet vendet fqinje për të ofruar kujdes shëndetësor për refugjatët, shumica e të cilëve janë gra dhe fëmijë. Disa nga sfidat kryesore shëndetësore që shohim janë hipotermia, sëmundjet e frymëmarrjes, mungesa e trajtimit për sëmundjet kardiovaskulare, kanceri, dhe çështjet e shëndetit mendor. Personeli i OBSH-së dhe është vendosur në vendet fqinje për të ofruar shëndet mendor dhe mbështetje psikosociale.”

Tedros tha se organizata ka dorëzuar 81 tonë metrikë furnizime në rajon dhe po punon për krijimin e një tubacioni për të marrë furnizime për objektet shëndetësore.

“Dje, ne dërguam 5 metrikë ton furnizime mjekësore në Kiev për të mbështetur kujdesin kirurgjik për 150 pacientë me traumë dhe furnizime të tjera për të menaxhuar një sërë kushtesh shëndetësore për 45,000 njerëz për një muaj. Më shumë furnizime do të shpërndahen sot”, tha ai.

Dr. Adelheid Marschang, oficer i lartë i urgjencës, tha se mbikëqyrja “e jashtëzakonshme” e Covid-19 mbetet në vend dhe rastet duket se janë në rënie.

“Duhet të themi në mënyrë të jashtëzakonshme, Ukraina ka ruajtur sistemin e saj të mbikëqyrjes ndaj Covid-19. Dhe ne kemi shënuar në javën e fundit 731 vdekje nga Covid-19, numri i rasteve duket se po zvogëlohet”, tha ajo, duke theksuar se organizata po monitoron edhe rrezikun e përhapjes së fruthit dhe poliomielitit në krizë.