Rama: Kurti e kishte festuar ditëlindjen e tij në shtëpinë time në Londër

Përparim Rama, kryetari i ri i Prishtinës, tha se kryeministri i Kosovës, Albin Kurti, e kishte festuar ditëlindjen në shtëpinë e tij në Londër, përcjell Shqip.com.

Teksa tregoi për miqësinë e tij me Kurtin, Rama theksoi se nuk do të mungojë bashkëpunimi mes tyre në qeverisjen për kryeqytetin.

“Edhe Albini ka qenë në shtëpinë time, ka festuar ditëlindjen, kemi kontakte, mendoj që ka me qenë një bashkëpunim i mirëfilltë. Kurti është kryeministër unë jam kryetar i komunës, dhe duhet të bashkëpunojmë për të mirën e popullit. Ai mendon për të mirën e popullit, edhe unë mendoj po ashtu. Nuk mendoj që ka me mungu bashkëpunimi mes neve”, tha ai në Kanal 10.

Ndërkaq, Rama ka njoftuar për Shqip.com se pozitën e të parit të kryeqytetit do ta marrë më 7 dhjetor, në një seancë inaguruese nga ora 10:00.

“Ditën e martë, më datë 07 dhjetor 2021, me fillim në ora 10:00 mbahet seanca inauguruese me ç’rast bëhet betimi i anëtarëve të Kuvendit Komunal të Prishtinës dhe betimi i Kryetarit të zgjedhur të Komunës së Prishtinës.

Gjithashtu, pas përfundimit të kësaj seance solemne, bëhet pranim-dorëzimi ceremonial i detyrës së Kryetarit të Komunës së Prishtinës”, shtoi ai.

Ndryshe, Përparim Rama nga Lidhja Demokratike e Kosovës, në raundin e dytë të zgjedhjeve lokale ka fituar 51.07 për qind të votave, ndërsa kundërkandidati i tij, Arben Vitia, nga Lëvizja Vetëvendosje ka marrë 48.93 për qind të votave./SHQIP.com