Familja nga Drenasi dyshojnë se vaksina anti-COVID’19 ua mbyti vajzën
Shqip
Një 23-vjeçare nga Komuna e Drenasit me inicialet I.Z., ka humbur jetën dy ditë pasi është vaksinuar kundër COVID-19.
Familjarët e saj pretendojnë se vaksina ishte shkaktare e vdekjes.
Ajo ishte vaksinuar me dozën e parë të vaksinës Pfizer me datë 13.09.2021.
Kështu ka bërë të ditur familjari i saj, Haxhi Xhemajli, i cili në profilin e tij në Facebook ka publikuar kartelën e vaksinimit kundër COVID-19 të së ndjerës.
“U detyrove të vaksinohesh që të qëndrosh në vendin e punës. Ajo vaksinë pas 48 ore të shkaktoj vdekjen. MOS NA #DETYRONI MOS NA #KUSHTËZONI Prehu në paqe mbesa jonë”, ka shkruar ndër të tjera Xhemajli.
Ndërsa, lajmin për vdekjen e 23-vjeçares e ka konfirmuar për Shqip.com edhe Arsim Haxhiu, drejtor i Shëndetësisë dhe Mirëqenies Sociale në Drenas.
Ai tha se ende nuk dihet nëse e ndjera ka pasur sëmundje të tjera shoqëruese, por shtoi se ekipi i Qendrës së Mjekësisë Familjare, policia dhe ekipi i Institutit të Mjekësisë Ligjore janë në teren.
Prej fillimit të vaksinimit në të gjitha qytetet e Kosovës janë dhënë 1.089.615 doza të vaksinës, deri më sot 385.297 qytetarë janë vaksinuar me dozën e dytë.
Në Kosovë janë duke u dhënë dy lloje të vaksinës kundër COVID-19, Pfizer dhe AstraZeneca. /SHQIP.com
