Lirohet Molliqaj dhe aktivistët e PSD-së

Kryetari, Dardan Molliqaj dhe disa aktivistë të Partisë Socialdemokrate janë liruar pasi që u arrestuan të martën, gjatë protestës në Prishtinë.

Lajmin për Shqip.com e ka konfirmuar zëdhënësi i Policisë së Kosovës për rajonin e Prishtinës, Agron Borovci, i cili tha se me vendim të prokurorit, ndaj të dyshuarve është inicuar hetim për veprën penale “Procedurë Kundërvajtëse”.

“Me vendim të prokurorit të shtetit ndaj dy të dyshuarve është iniciuar hetim për veprën penale ‘Pengim i personit zyrtar në kryerjen e detyrës zyrtare’ përderisa ndaj të gjithëve është iniciuar ‘Procedurë Kundërvajtëse’. Të njëjtit janë liruar në procedurë të rregullt”, ka thënë ai.

Ai shtoi se hetuesit policorë të udhëhequr nga prokurori i shtetit, kanë kryer veprimet preliminare për sqarimin dhe ndriçimin e plotë të rrethanave që kanë karakterizuar ngjarjen.

Ndryshe, të martën derisa po mbahej konferenca për medie e kryetares së Gjykatës Speciale, Ekaterina Trendafilova, Polica jashtë ka arrestuar aktivistët e PSD-së, pasi këta të fundit protestuan kundër krijimit të Gjykatës Speciale. Ata në shenjë revolte kanë vendosur ngjyrë në veturat e zyrtarëve të EULEX-it./Shqip.com