Një fije shprese – e quajtur “Benzema”
Ekipi i tij u mposht.
Por, ai nuk u largua si humbës.
Tjetër natë e madhe nga Karim Benzema.
Tjetër dëshmi – që është në zenit të karrierës.
Sulmuesi francez shënoi dy gola – për të mbajtur ende të gjalla shpresat e madrilienëve – për një përmbysje të rezultatit në “Santago Bernabeu”.
Një ndeshje më parë në La Liga, ai kishte humbur dy penalti, por sonte shënoi një panenka.
I ftohtë akull. Hera e parë në karrierë që realizon 41 gola.
“Ne kemi nevojë për tifozët e Bernabeut tani më shumë se kurrë. Ne mund ta bëjmë atë. Panenka? Është normale – kam besim të plotë në veten time”, u shpreh francezi pas ndeshjes.
Tashmë, ai është autor i 13-të golave në Champions, në vetëm dhjetë ndeshje të zhvilluara.
Teksa, në La Liga është golashënuesi dhe asistuesi më i mirë. 25 gola dhe 11-të asistime.
Numri 9 i mbretërve – e mban epitetin e favoritit kryesor për ta fituar Topin e Artë – për këtë vit.
Por, sezoni nuk ka përfunduar ende.
“Tigri i bardhë” i ishte bashkuar “galaktikëve” në vitin 2009, dhe sonte ishte ndeshja e 600-të që e djersit fanellën – që ka peshë të madhe.
35 milionët e paguar për të në vitin 2009 – që atëherë dukej një çmim astronomik, tashmë i ngjasojnë një shakaje.
