Zyrtarët amerikanë: Vladimir Putin mund të përdorë armë kimike

Presidenti i Rusisë, Vladimir Putin, mund të përdorë armë kimike në Ukrainë nëse trupat e tij vazhdojnë të humbasin terren, kanë vlerësuar zyrtarët e administratës Biden.

Gjashtë njerëz me njohuri për këtë çështje i thanë Politico se Moska mund të përdorë armët kimike së pari përpara se të shqyrtojë një konfrontim bërthamor me NATO-n, raportojnë mediat e huaja.

ShBA ka qenë e prirur të monitorojë nga afër çdo përdorim të mundshëm të armëve kimike në Ukrainë dhe i ka shtyrë aleatët të jenë të përgatitur për një ngjarje të tillë.

Asnjë inteligjencë nuk sugjeron se një sulm kimik në Ukrainë është i pashmangshëm, kanë thënë zyrtarët amerikanë.

Në vend të kësaj, pritet që luftimet të ngadalësohen gjatë muajve të dimrit. Por zyrtarët anonimë thanë se Rusia mund të përpiqet të përdorë armë kimike që fshihen lehtësisht dhe që mund të jetë më e vështirë për t’u lidhur me Moskën.

Po sipas zyrtarëve dhe ekspertëve, disa armë mund të përdoren për një sulm masiv me viktima duke u kthyer në aerosol ose duke u përdorur në municione.