Zëri i Amerikës: Kosova dhe Serbia do të ftohen në Samitin për Demokraci
Shqip
Kosova dhe Serbia do të ftohen në Samitin për Demokraci, i cili organizohet nga presidenti amerikan, Joe Biden.
Kështu raportoi këtë të premte Zëri i Amerikës, në versionin e gjuhës serbe, përcjell Shqip.com.
Ky mediumi megjithatë ka thënë se ende nuk ka marrë konfirmim zyrtar për këtë informacion dhe se i është drejtuar Departamentit të Shtetit, por nuk ka pranuar ende përgjigje.
Ditë më parë, mediumi amerikan “Politico” publikoi një listë me 100 shtete që janë ftuar nga Bideni për Samitin e dhjetorit, që do të mbahet për herë të parë në Shtetet e Bashkuara të Amerikës.
Kosova ka mbetur jashtë kësaj liste. Bashkë me të, jashtë kanë mbetur edhe Serbia dhe Bosnja.
Ambasada Amerikane në Prishtinë ka dhënë arsyet se përse Kosova është lënë anash këtij samiti.
“Samiti për Demokraci i Presidentit është një nga shumë nismat amerikane e fokusuar në avancimin e demokracisë, luftimit të korrupsionit dhe promovimin e respektimit të të drejtave të njeriut anë e mbanë botës. Jo të gjithë partnerët mund të akomodohen në këtë nismë”, thuhet në njoftimin e ambasadës.
Mosftesa e Kosovës në këtë samit ka ngjallur reagime të shumta. Opozita ka fajësuar kryeministrin, Albin Kurti dhe presidenten, Vjosa Osmani. Sipas tyre, ata janë duke e “izoluar” Kosovën. /Shqip.com
